اطلاعات کے مطابق، مرکزی وزیر برائے پارلیمانی امور پرہلاد نے اپنے دو معاون ریاستی وزراء ارجن رام میگھوال اور وی مرلی دھر کے ساتھ حزب اختلاج کی سب سے بڑی پارٹی کانگریس کے سینیئر رہنما غلام نبی آزاد سے ان کے گھر پر ملاقات کی۔ وزراء نے عید الفطرکے موقع پر کانگریس رہنما کو مبارک باد پیش کی اور آگے آنے والے پارلیمانی اجلاس میں انکی پارٹی سے تعاون مانگا۔
اطلاعات کے مطابق حکومت نے لوک سبھا اجلاس کے پیش نظر 16 جون کو پارلیمینٹ میں تمام پارٹیوں کا اجلاس طلب کیا ہے جہاں وہ پارلیمنٹ کی کاروائی کو بحسن و خوبی چلانے کے لیے سبھی سیاسی پارٹیوں سے تعاون مانگیں گے۔
لوک سبھا اجلاس کی شروعات 17 جون سے ہوگی۔ پہلے دو دنوں میں نئے رکن پارلیمینٹ کے حلف لینے کے بعد 19 جون کو اسپیکر کا انتخاب کیا جائیگا۔ صدر رام ناتھ کووند 20 جون کو پارلیمینٹ کے دونوں ایوانوں سے مشترکہ طور پر خطاب کرینگے۔
سترہویں لوک سبھا کا پہلا پارلیمانی سیشن 17 جون سے 26 جولائی تک چلےگا، جس میں 19 جون کو لوک سبھا اسپیکر کا انتخاب ہوگا اور 5 جولائی کو بجٹ پیش کیا جائیگا۔ پہلے دو دن لوک سبھا کے سبھی منتخب اراکین کو پارلیمینٹ کی رکنیت کا حلف دلایا جائیگا۔ اسکے بعد 19 جون کو اسپیکر کے انتخاب کے بعد 20 جون کو پارلیمینٹ کے مشترکہ اجلاس سے صدر مخاطب ہوں گے۔
کل 30 دن کے اجلاس میں 4 جولائی کو لوک سبھا میں حکومت اقتصادی تحفظ سے متعلق رپورٹ پیش کریگی۔اس کے بعد 5 جولائی کو وزیر خزانہ نرملا سیتارمن بجٹ پیش کریں گی۔
اس سے قبل اسی سال یکم فروری کو پیوش گوئل نے حکومت کی طرف سے آخری بجٹ پیش کیا تھا۔
