کورونا وائرس کی وبا کو دیکھتے ہوئے مغلیہ دور کی تاریخی مسجد فتحپوری کے شاہی امام ڈاکٹر مفتی مکرم احمد نے ایک ویڈیو جاری کرتے ہوئے مسلمانوں سے اپیل کی ہے کہ وہ شب برات کے موقع پر اپنے گھروں میں ہی رہ کر عبادت کریں۔
اس رات میں عام طور پر قبرستان جانے کا رواج ہے لیکن یہ فرض نہیں ہے اس لیے راتوں میں قبرستان جانے سے بچیں اور گھر پر رہ کر پوری انسانیت کے لیے خداوند کے سامنے ہاتھ اٹھا کر دعا مانگیں
انہوں نے کہا کہ اس رات میں تقدیریں لکھی جاتی ہیں اس لیے اس رات میں جو بھی دعا کی جائے گی وہ قبول ہوگی، موجودہ حالات کو دیکھتے ہوئے اس بات کی جانب بھی اشارہ کیا کہ مسلمانوں کو چاہیے کہ وہ بھارتی وزیراعظم کے اعلان کی خلاف ورزی نہ کریں اور اس وباء کو پھیلنے سے روکنے میں اپنا کردار ادا کریں۔
مفتی مکرم نے والدین سے بھی یہ درخواست کی کہ وہ اپنے بچوں پر نگرانی رکھیں اور انہیں بازاروں میں گھومنے سے روکیں۔
قابل ذکر ہے کہ 9 اپریل یعنی جمعرات کے روز شب برات ہے اس رات میں مسلمان اللہ کے سامنے گریہ و زاری کرتے ہوئے دعائیں مانگتے ہیں لیکن رواں برس تمام لوگوں کو لاک ڈاؤن اور کورونا وائرس کے انفیکشن کو روکنے کے لیے عوام گھروں میں عبادات کا اہتمام کریں۔
