مدھیہ پردیش سے کانگریس کے رکن اسمبلی گووردھن ڈانگی نے بی جے پی کی رکن پارلیمان سادھوی پرگیہ ٹھاکر کے خلاف متنازع بیان دیتے ہوئے کہا کہ اگر وہ ریاست میں داخل ہوئیں تو انہیں زندہ جلادیں گے۔
کانگریس کے رکن اسمبلی سادھوی کے اس بیان سے مشتعل ہیں جس میں پرگیہ نے ناتھو رام گوڈسے کی تعریف تھی۔ پرگیہ نے پارلیمنٹ میں ایس پی جی گروپ کے بل پر بحث کے دوران ناتھو رام گوڈسے کو محب وطن قرار دیا تھا۔
رکن اسمبلی نے میڈیا سے بات کرتے ہوئے کہا کہ اگر وہ ریاست میں داخل ہوئیں تو ہم نہ صرف اس کا پتلہ نذر آتش کریں گے بلکہ اسے بھی جلادیں گے۔
کانگریس کارکنان نے کل راج گڑھ ضلع کے بیورا میونسپلٹی میں پرگیہ ٹھاکر کا مجسمہ نذر آتش کیا تھا اور اس کے خلاف نعرے بازی کرتے ہوئے احتجاج بھی کیا تھا۔
قبل ازیں 50 اراکین پارلیمنٹ بشمول آدھی رنجن چودھری ، دیاندھی مارن ، مانیکا ٹیگور اور این کے پریم چندر نے لوک سبھا اسپیکر اوم برلا کو ایک خط لکھتے ہوئے مہاتما گاندھی کی تحقیر پر پرگیہ ٹھاکر کی سرزنش کرنے کی اپیل کی تھی۔
