مغربی بنگال فرقہ وارانہ ہم آہنگی اور مذہبی رواداری کے لیے پورے ملک میں جانا جاتا ہے ۔
کولکاتا میں مختلف مذاہب کے لوگ ایک ساتھ مل کر سبھی تہوار مناتے ہیں۔
ایسا ہی نظارہ کرسمس کے موقع پر کولکاتا کے پارک اسٹریٹ میں نظر آتا ہے ہندو مسلم سکھ عیسائی سب پارک اسٹریٹ جمع ہوکر کرسمس مناتے ہیں۔
کولکاتا کا کرسمس پورے بھارت میں اپنے خوبصورت رنگوں سے مزین لائٹنگ کے لیے مشہور ہے۔
ہر برس کرسمس کے موقع پر کولکاتہ کے پارک اسٹریٹ کو شاندار لائٹنگ سے مزین کیا جاتا ہے، جو دیدہ کافی زیب ہوتے ہیں اور دور دراز سے لوگ پارک اسٹریٹ کی لائٹنگ دیکھنے کے لئے آتے ہیں۔
اس کے علاوہ کولکاتا کے کرسمس کی خاص بات یہاں کے لوگوں کی مذہبی رواداری ہے تمام مذاہب کے لوگ آج کے دن پارک اسٹریٹ میں کرسمس مناتے نظر آتے ہیں۔
پارک اسٹریٹ کے ایلن پارک کو خصوصی طور پر سجایا جاتا ہے پارک اسٹریٹ کولکاتا کا وہ علاقہ ہے جہاں سب سے زیادہ اینگلو انڈین رہتے ہیں اور انگریزی حکومت کے دور میں بھی اس علاقہ کو خاص اہمیت حاصل تھی اور آج بھی کولکاتا کے مشہور ترین علاقوں میں پارک اسٹریٹ کا شمار ہوتا ہے۔
اس موقع پر ایلن پارک کے پاس کرشمس منانے آئی فرحین نے ای ٹی وی بھارت سے بات کرتے ہوئے کہا کہ کولکاتا ایسا شہر جہاں ہر تہوار سب مل کر مناتے ہیں چاہے درگا پوجا ہویا عید یا کرسمس کولکاتا کے لوگوں میں مذہبی رواداری ہے۔
انہوں نے کہا کہ یہاں کے لوگ ایک ساتھ مل کر رہنا پسند کرتے ہیں اور جو لوگ ملک میں نفرت پھیلانے کی کوشش کر رہے ہیں۔ ان کو کولکاتا شہر محبت کا پیغام دیتا ہے۔
وہیں سدرا نے کہا کہ ملک میں جو موجودہ ماحول ہے ایسے میں کولکاتہ ان کے لئے مثال ہے جہاں ہر مذہب کے لوگ ایک ساتھ ملکر رہتے ہیں۔
ایک بزرگ پارتھو نے ای ٹی وی بھارت سے بات کرتے ہوئے کہا کہ کولکاتا شہر ہمیشہ سے ہی مذہبی رواداری کا گہوارہ رہا ہے یہاں کے لوگ مذہب کے نام پر آپس میں نفرت کو ہوا نہیں دیتے ہیں جو لوگ مذہب کے نام نفرت پھیلاتے ان کے لئے کولکاتا شہر میں کوئی جگہ نہیں ہے۔
