چینی سفیر سن ویڈونگ نے بھارت چین یوتھ ویبنار کے دوران کہا کہ چین بھارت کو ایک حریف کی بجائے شراکت دار کے طور پر دیکھتا ہے، انہوں نے یہ بھی کہا کہ چین کے لیے بھارت خطرہ نہیں بلکہ ایک موقع ہے۔
واضح رہے کہ چینی سفیر کا یہ بیان گلوان وادی میں بھارت اور چینی فوج کے درمیان ہوئے پرتشدد تصادم کے بعد سامنے آیا ہے، بھارت اور چین کی وادی گلوان میں پرتشدد تصادم کے بعد دونوں ممالک کے مابین بات چیت کا سلسلہ جاری ہے۔
اسی تسلسل میں چینی سفیر سن ویڈونگ نے بھارت چین یوتھ ویبنار کے دوران مزید کہا کہ 'ہم دوطرفہ تعلقات میں بہتری لاتے ہوئے سرحدی تنازعہ کو مناسب جگہ پر حل کرنے کی کوشش کریں گے۔'
اس کے ساتھ انہوں نے یہ بھی کہا کہ 'بات چیت اور مشاورت کے ذریعے ، ہم اختلافات کو ٹھیک طریقے سے حل کریں گے اور دو طرفہ تعلقات کو جلد از جلد پٹڑی پر لائیں گے۔'
