بنگلور تشدد سی سی ٹی وی فوٹیج میں قید

بنگلور میں پر تشدد جھڑپ کی سی سی ٹی وی فوٹیج جاری کی گئی جس میں دیکھا جاسکتا ہے کہ کس طرح ہجوم نے کاول بائیرا سندرا میں کانگریس رکن اسمبلی سرینواس مورتی کے مکان کو توڑ پھوڑ کا نشانہ بنایا اور اس کے علاوہ 7 تا 8 گاڑیوں کو بھی آگ لگادی جس میں ڈی سی پی کی کار بھی شامل ہے۔

اس میں یہ بھی دیکھا جاسکتا ہے کہ کس طرح برہم ہجوم نے اسٹریٹ لائٹس اور دکانوں میں موجود سی سی ٹی وی اور پولیس کی جانب سے لگائے گئے سی سی ٹی وی کیمروں کو توڑ پھوڑ کا نشانہ بنایا۔

سوشل میڈیا پر قابل اعتراض پوسٹ پر پولیس کے ذریعہ منگل کی شب ڈی جے ہلی اور کے جی ہلی پولیس تھانہ علاقوں میں تشدد بھڑکنے کے بعد ہجوم پر فائرنگ کرنے سے کم از کم تین افراد کی موت ہو گئی اور متعدد زخمی ہوگئے۔

سرکاری ذرائع کے مطابق علاقے میں امن وامان برقرار رکھنے کے لئے دو علاقوں میں کرفیو نافذ کردیا گیا ہے۔ پولیس کمشنر نے لوگوں سے تشدد نہ کرنے کی اپیل کی ہے۔ ذرائع نے بتایا کہ احتیاطی طور پرعلاقے میں پولیس کی اضافی نفری تعینات کردی گئی ہے۔