دھیریندر کو اترپردیش پولیس کی ایس ٹی ایف نے لکھنؤ کے جنیشور پارک سے گرفتار کیا تھا، اس کے بعد ملزم کو بلیا کوتوالی لایا گیا، جہاں آج اسے عدالت کے سامنے پیش کیا گیا، اتوار کو بلیا قتل معاملے کے کلیدی ملزم دھیریندر پرتاپ سنگھ سمیت 5 ملزمین کو پولیس نے گرفتار کیا تھا۔
ایس ٹی ایف نے لکھنؤ میں پالی ٹیکنک چوراہے کے نزدیک سے دھیریندر کو گرفتار کیا تھا، اس معاملے میں نامزد ملزم سنتوش یادو و امرجیت یادو کو بلیا کے ایک ہوٹل سے گرفتار کیا گیا ہے، تینوں کی گرفتاری پر 50-50ہزار روپئے کے انعام کا اعلان کیا گیا تھا۔
یہ بھی پڑھیں: بلیا قتل کیس: بی جے پی کے صدر کا ایم ایل اے کو انتباہ
پولیس نے ابھے سنگھ اور دھرمیندر سنگھ کو وارانسی سے گرفتار کیا ہے، اس ضمن میں پولیس ابھی تک 10 افراد کو گرفتار کرچکی ہے، ایس ٹی ایف نے اتوار کی دیر رات دھیریندر کو بلیا پولیس کے حوالے کردیا تھا۔
گذشتہ 15اکتوبر کو درجن پور گاؤں میں راشن کی دوکان کے سلسلے میں دھیریندر نے جئے پرکاش کے سینے میں گولی مار دی تھی اور فرار ہوگیا تھا، سابق فوجی دھیریندر بی جے پی حامی ہے اور بیریا سے پارٹی کے ایم ایل اے سریندر سنگھ اس کی حمایت میں سامنے آئے تھے۔
دھیریندر نے ایس ڈی ایم اور پولیس سرکل افسر کے سامنے گولی ماری تھی۔ وزیر اعلی نے اس حادثے کے بعد دونوں افسران کو فوری اثر سے معطل کردیا تھا۔
