اترپردیش کے نوئیڈا میں بھیم آرمی کے بانی چندر شیکھر نے سیاسی پارٹی کا اعلان کیا اس پارٹی کا نام آزاد سماج پارٹی رکھا گیا ہے، اس کے بعد منعقدہ پروگرام سے خطاب کرتے ہوئے متفقہ طور پر چندر شیکھر آزاد کو پارٹی کا صدر مقرر کیا گیا۔
آزاد سماج پارٹی کے قومی صدر چندر شیکھر نے اس موقع پر کہا کہ حکومت نے ایسے حالات پیدا کر دیے ہیں کہ پارٹی تشکیل دینی پڑی۔ ریزرویشن کو ختم کرنے کی کوششیں، بڑھتی بے روزگاری، تعلیم، صحت، شہریت اور معیشت پر حکومت ہر جگہ ناکام ہوچکی ہے، موجودہ حکومت آمرانہ ایجنڈے کو لوگوں پر مسلط کر رہی ہے اور اگر کوئی حکومت کے ایجنڈے کے خلاف آواز بلند کرتا ہے تو اس کے خلاف کارروائی کی جا رہی ہے۔ایسے میں ان کی پارٹی سیاسی طور پر لڑے گی۔
چندر شیکھر نے کہا کہ بہوجن سماج کے پاس خود 85 فیصد ووٹرز ہیں ایسی صورتحال میں انہیں کسی کی ضرورت نہیں ہے، آزاد سماج پارٹی کے قومی صدر نے اعلان کیا کہ ان کی پارٹی سنہ 2022 میں اترپردیش میں ہونے والے اسمبلی انتخابات میں تمام نشستوں پر اپنے امیدوار اتارے گی۔
چندر شیکھر آزاد نے مزید کہا کہ وہ این پی آر کے حق میں نہیں ہیں اور ایک ایک کارکن سمیت تمام لوگوں کو این پی آر کے بارے میں معلومات فراہم کرائیں گے، اور وہ این پی آر کو کسی بھی قیمت پر نہیں ہونے دیں گے، این پی آر کے نام پر حکومت جو سازش کر رہی ہے اس کو بھی کبھی کامیاب نہیں ہونے دیں گے۔
