ریاست اترپردیش کے سابق وزیر اعلیٰ اکھیلیش یادو نے منگل کو جاری اپنے بیان میں کہا کہ متاثرہ کی سکیورٹی پر تعینات سکیورٹی اہلکار کو کلین چیٹ دی جارہی ہے جبکہ اسے اپنی ڈیوٹی کے تحت اس کے ساتھ جانا تھا۔
اس سنگین معاملے کی غیرجانبدارانہ انصاف کے لئے سی بی آئی جانچ ہونی چاہیے۔ انہوں نے کہا کہ ملزم ایم ایل اے کو اترپردیش سے باہر کسی جیل میں بھیجا جانا چاہیے۔
اس واقعہ میں متأثرہ اور اس کے وکیل شدید طور سے زخمی ہیں۔ اور اس معاملے میں شک کوتقویت اس لئے ملتی ہے کہ پہلے اس واقعہ کے ایک گواہ کی جان جا چکی ہے۔ ملزم بی جے پی رکن اسمبلی اب بھی متأثرہ خاندان کو دھمکیاں دے رہے ہیں۔
ایس پی سربراہ نے کہا کہ متاثرہ کے ساتھ بہت ناانصافی ہوئی ہے، سرکار تو اس وقت بیدار ہوئی جب آٹھ اپریل 2018 کو اس نے وزیر اعلی رہائش گاہ کے پاس خودکشی کی کوشش کی۔
اتوار کو پیش آئے حادثے میں تو متاثرہ بچ گئی ہے لیکن اس کی جان خطرے میں ہے۔ اس کو شدید چوٹیں آئی ہیں۔
اکھیلیش یادو نے کہا کہ پولیس افسران حکومت کی زبان بول رہے ہیں۔ انہیں متاثرہ بیٹی کی بات بھی سننی چاہیے۔ انہوں نے کہا کہ قتل کی جانچ کسی غیر جانبدار ایجنسی سے ہوسکتی ہے۔افسران کو انصاف کے لئے کام کرنا چاہئے۔
خیال رہے کہ اترپردیش کےضلع رائے بریلی میں اتوار کو پیش آئے سڑک حادثے میں اناؤ ریپ متاثرہ کی چچی کی موت ہوگئی تھی جب کہ وہ اور اس کے وکیل شدید طور سے زخمی ہوگئے تھے۔ متاثرہ کار سے اپنے اہل خانہ کے ساتھ رائے بریلی جیل میں بند اپنے رشتے دار سے ملنے جارہی تھی۔ گروبخش گنج علاقے میں رائے بریلی باندہ ہائی وے پر سلطان پور کھیڑا موڑ کے نزدیک ایک ٹرک نے کار کو ٹکر ماردی تھی۔
