گذشتہ 10 جون کو مغربی بنگال کے این آر ایس میڈیکل کالج اور اسپتال کے جونیئرڈاکٹروں کے ساتھ بدسلوکی کے معاملے میں گرفتار پانچ افراد کومقامی عدالت نے عارضی طور پر ضمانت پر رہا کرنے کی ہدایت دی ہے۔
سیالدہ عدالت نے فریقین کے دلائل سننے کے بعد ملزمین کو دو ہزار کے ذاتی مچلکے پر رہاکرنے کی ہدایت دی۔
ضمانت ملنے والوں میں محمد شاہنواز، عادل حسین،عادل شیخ،محمد یوسف اور محمد بادل شامل ہیں۔
خیال رہے کہ 85 سالہ مریض کی موت کے بعد اس کے رشتہ داروں نے جونیئرڈاکٹرز کے ساتھ مارپیٹ کی تھی جس میں دو جونیئر ڈاکٹر شدید طور پر زخمی ہوگئے تھے۔
اس واقعہ کے بعد بنگال کے سرکاری ہسپتالوں کے جونیئر ڈاکٹرز ہڑتال پر چلے گئے تھے، جو ایک ہفتے تک جاری رہا اور ملک بھر میں اس ہڑتال کو حمایت ملی۔ بعد میں وزیراعلی ممتا بنرجی کی جونیئر ڈاکٹروں سے ملاقات کے بعد ہڑتال ختم ہوسکا۔
سرکاری وکیل نے ضمانت کی مخالفت کرتے ہوئے کہا کہ معاملے کی حساسیت کو دیکھتے ہوئے پانچوں افراد کو ضمانت پر رہا نہ کیا جائے۔ تاہم ججز نے کہا کہ گزشتہ تین ہفتوں سے اس معاملے کی تحقیقات میں کوئی پیش رفت نہیں ہوئی ہے اس لیے ضمانت دی جارہی ہے۔
