نئی دہلی: مرکزی حکومت کی اگنی پتھ اسکیم کو لے کر ملک بھر میں مسلسل پرتشدد احتجاج ہو رہے ہیں۔ ساتھ ہی کئی ریاستوں میں مظاہرے کے دوران کئی پرتشدد واقعات بھی پیش آئے ہیں۔ فی الحال بہار میں مظاہرین اور طلبہ تنظیموں کی جانب سے بہار بند کی کال کے بعد بھارت بند کی کال دی گئی ہے۔ اس سلسلے میں ملک کی تمام ریاستوں میں انتظامیہ نے حفاظتی نظام کو بڑھانے کی ہدایات دی ہیں۔ اگنی پتھ اسکیم کے خلاف ملک بھر میں احتجاج تھمنے کا نام نہیں لے رہا ہے۔ کئی ریاستوں میں ہزاروں مشتعل نوجوان اس اسکیم کے خلاف پرتشدد احتجاج کرتے نظر آ رہے ہیں۔ اگنی پتھ اسکیم کے حوالے سے اتوار کو تینوں افواج نے مشترکہ پریس کانفرنس کی۔ جس میں اگنی پتھ اسکیم کے فوائد بتائے گئے۔ تاہم احتجاج کرنے والے نوجوانوں نے پیر کو بھارت بند کا اعلان کیا ہے۔ Bharat bandh against agnipath scheme on 20 june 2022
بھارت بند کے اعلان کے پیش نظر آر پی ایف اور جی آر پی ہائی الرٹ پر ہیں۔ اس لیے آر پی ایف کے سینئر افسران نے تشدد میں ملوث مظاہرین کے خلاف سختی سے نمٹنے کے احکامات دیے ہیں۔ حکم نامے میں واضح طور پر کہا گیا ہے کہ تشدد کرنے والوں کے خلاف سنگین دفعات کے تحت کارروائی کی جائے گی۔ بھارت بند کے اعلان کے بعد آر پی ایف اور جی آر پی حکام نے کہا ہے کہ تمام علاقوں پر سخت نظر رکھی جائے گی، اگر کوئی مظاہرین تشدد میں ملوث ہوا تو اس کے ساتھ سختی سے نمٹا جائے گا۔ بھارت بند کے دوران ہر طرح کی سرگرمیوں پر کڑی نظر رکھی جائے گی۔ اس کے ساتھ موبائل، کیمرہ، سی سی ٹی وی کے ذریعے تشدد کرنے والوں کے خلاف ڈیجیٹل شواہد اکٹھے کرنے کے احکامات دیے گئے ہیں۔
فوج کی بھرتی کے لیے شروع کی گئی نئی اگنی پتھ اسکیم کے خلاف پیر کو ممکنہ بھارت بند کے پیش نظر پنجاب پولیس کو الرٹ رہنے کی ہدایت دی گئی ہے۔ اس کے ساتھ ساتھ پنجاب کے تمام بڑے ملٹری کوچنگ انسٹی ٹیوٹ کے اطراف سیکیورٹی بڑھانے کی بھی ہدایات دی گئی ہیں۔ ہریانہ میں بھی فوج کے اگنی پتھ اسکیم کے خلاف مظاہروں کے درمیان بھارت بند کے حوالے سے حفاظتی انتظامات سخت کر دیے گئے ہیں۔ جس کے تحت فرید آباد پولیس نے امن و امان کے نقطہ نظر سے سیکورٹی نظام سے متعلق تمام تیاریاں مکمل کر لی ہیں۔ حفاظتی نظام کو برقرار رکھنے کے لیے فرید آباد میں آج 2 ہزار سے زیادہ پولیس اہلکار تعینات کیے گئے ہیں۔
- مزید پڑھیں:۔ Agneepath Scheme Protest: اتر پردیش میں اب تک 260 گرفتار، پولیس اور جی آر پی کی چھٹی منسوخ
اگنی پتھ اسکیم کی مخالفت کا منفی اثر وسطی بھارت میں بھی دیکھا جا رہا ہے۔ نوجوانوں کی طرف سے بلائے گئے بھارت بند کے پیش نظر جھارکھنڈ میں پیر کو تمام اسکول بند رکھنے کی ہدایات دی گئی ہیں۔ جھارکھنڈ کے ایجوکیشن آفیسر نے مطلع کیا ہے کہ طلباء کی حفاظت کے پیش نظر پیر کو جھارکھنڈ کے تمام اسکول بند رہیں گے۔
