نئی دہلی: بہار میں معاون اردو مترجمین کی تقرری کے زیر التوا معاملے پر انجمن محافظ اردو بہار گیا کے جنرل سکریٹری سید فضل وارث نے جاری بیان میں کہا کہ معاون اردو مترجمین کی تقرری کا معاملہ حل کرنے کے لئے سمادھان یاترا کے دوران گیا میں قابل احترام وزیر اعلیٰ بہار نتیش کمار کو میمورنڈم بھی دیا جا چکا ہے لیکن ابھی تک خاطر خواہ نتیجہ سامنے نہیں آپایا ہے۔ انہوں نے کہا کہ ان دنوں صوبہ بہار میں معاون اردو مترجمین کی تقرری کا معاملہ چل رہا ہے۔ تقرری نہیں ہورہی ہے۔ کامیاب امیدوار متعلقہ افسران کو درخواست دے چکے ہیں، وزیر اعلیٰ اور نائب وزیر اعلیٰ بہار کی توجہ مبذول کرائی گئی ہے لیکن معاملہ زیر التوا ہے۔
واضح رہے کہ نائب اردو مترجمین کے خالی عہدوں پر تقریر کے لیے نو ٹیفیکشن نومبر 2019 میں ہوا تھا جس کا امتحان 2022 میں ہوا۔ اس عہدے کے امیدواروں کے امتحان پاس کرنے کے باوجود چھ ماہ سے یہ بھٹک رہے ہیں۔ امتحان میں کامیاب امیدواروں کا عزت مآب وزیراعلیٰ اور نائب وزیراعلیٰ بہار سے کہنا ہے کہ ' 1294 معاون اردو مترجم کی ویکنسی ابھی تک زیر التوا ہے۔ پی ٹی اور مینس کے نتائج جاری ہونے اور کونسلنگ ہونے کے باوجود اب تک فائنل میرٹ لسٹ جاری نہیں ہوسکی ہے۔'
انہوں نے کہا کہ حکومت مداخلت کرے آر بی ایس ایس سی کو حکم دے تو کم از کم ان امیدواروں کی فائنل فہرست جاری ہوسکتی ہے جن کا معاملہ کورٹ میں زیر التوا نہیں ہے یعنی وہ امیدوار جو جنرل زمرے میں ہیں یا اوبی سی، ایس سی،ایس ٹی،ای ڈبلیو ایس کے وہ امید وار جن کے دستاویزات ایس ایس سی کے نوٹیفیکیشن کے مطابق درست ہیں کیونکہ ان کا کورٹ کے معاملہ سے لینا دینا بھی نہیں ہے۔ اور نہ ان کا معاملہ کورٹ میں زیر التوا ہے۔ لہٰذا کامیاب امیدواروں کی تقرری کو جلد سے جلد یقینی بنا یاجانا نہایت ضروری ہے۔ وزیراعلیٰ بہار اور نائب وزیراعلیٰ بہار فوری خصوصی توجہ دے کر اردو آبادی کے دیرینہ اور موجودہ اہم اردو مسائل جلد حل کرنے کے لیے مؤثر اقدام کریں گے تاکہ ان کا اعتماد و یقین اردوق آبادی کے درمیان مزید مستحکم ہوسکے کیوں کہ وت بہت کم ہے۔ کم وقت میں انہیں تاریخ ساز فیصلہ بھی لینا ہے۔
انہوں نے کہا کہ ارد و آبادی کے درینہ مسائل جنہیں جلد از جلد حل کرنے کی ضرورت ہے۔ صوبہ بہار کے سکنڈر ی و 2+ اسکولوں میں اردو کی لازمیت کو بحال کرنا، مدرسہ اسلامیہ شمس الہدیٰ میں مختلف مضامین کے اساتذہ بحال کرنا، بہار مدرسہ ایجوکیشن بورڈ کی تشکیل نوکراکر اس کی ذمہ داری ایک ایمان دار شخص کو سونپنا، بہار اردو اکادمی کی تشکیل نوکرنا، اردو مشاورتی کمیٹی کی تشکیل نوکرنا، اردو اساتذہ کی تقرری کرنا، بچوں کو مفت درسی کتابیں وقت پر مہیا کرانا، اقلیتی ہوسٹل میں اردو لائبریری کا قیام کرنا وغیرہ۔ فضل وارث نے کہا کہ ضرورت اس بات کی ہے کہ جو لوگ وزیراعلیٰ بہار سے بہت قریب ہیں وہ ان مسائل کو وزیراعلیٰ کو بتائیں اور جلد حل کرانے کی کوشش کریں۔ جائز حقوق کی حصولیابی میں اپنا بھر پور تعاون دیں۔ کامیاب نائب اردو مترجم کی تقرری کے لیے راہ ہموار کریں۔
یو این آئی
