بہار اسمبلی انتخابات میں پانچ نشستوں پر کامیابی کے بعد رکن اسمبلی اسدالدین اویسی کی پارٹی کے اعتماد میں اضافہ ہوا ہے، اسدالدین اویسی کے چھوٹے بھائی اکبر الدین اویسی نے کہا کہ بہار میں مجلس کی کامیابی بھارت کی سیاست میں ایک نئی تاریخ لکھے گی اور دنیا دیکھے گی کہ ایم آئی ایم پورے بھارت میں اپنا جھنڈا لہرائے گی۔
خیال رہے کہ بہار اسمبلی انتخابات کے نتائج کے بعد جہاں تمام اراکین اسمبلی پٹنہ پہنچ چکے ہیں اور وہ حکومت سازی کے عمل مصروف ہیں، تو اسی درمیان اے آئی ایم آئی ایم نے اپنے تمام پانچوں اراکین اسمبلی کو حیدرآباد مدعو کیا ہے، ذرائع کے مطابق اویسی نے پارٹی اراکین اسمبلی کے ٹوٹنے کے خوف سے یہ کام کیا ہے۔
جمعہ کے روز اکبرالدین اویسی نے بہار کے نو منتخب پانچوں اراکین اسمبلی سے ملاقات کی، اس دوران جونیئر اویسی نے کہا کہ ان کی پارٹی کو مسلم ووٹوں کی تقسیم کے الزامات کی کوئی پرواہ نہیں ہے اور وہ یقینی طور پر دوسری ریاستوں میں اپنی پارٹی کی بنیاد مضبوط کریں گے۔
اکبرالدین اویسی نے حیدرآباد میں منعقد ایک پروگرام میں کہا 'دوست اور دشمن کی پہچان کرو، اپنے پیاروں اور غیروں کو پہچان لو، اور یہ کہتے ہوئے کہ، حالات چیخ کر چلا کر کہہ رہے ہیں ایک مرکز ایک محاذ پر متحد ہو جاؤ۔
چھوٹے اویسی مزید کہتے ہیں 'اپنے آپ کو پہچان لو، تہمت، الزام لگتے رہے ہیں، ہمیں اس کی پرواہ نہیں ہے، بہار کی کامیابی بھارت کی سیاست میں ایک نئی تاریخ لکھے گی اور دنیا دیکھے گی کہ مجلس پورے بھارت میں اپنا پرچم لہرائے گی، ہم ستر برسوں سے نظرانداز لوگوں کی نمائندگی کر رہے ہیں۔'
