اسدالدین اویسی گجرات کا دورہ کریں گے

گجرات میں اسمبلی انتخابات ہونے والے ہیں۔ اس سے قبل تمام سیاسی پارٹیاں انتخابات کی تیاریوں میں مصروف نظر آرہی ہیں۔ ایسے میں گجرات کی سیاست میں بلدیاتی انتخابات سے پہلی مرتبہ قدم رکھنے والی آل انڈیا مجلس اتحاد المسلمین نے بھی اسمبلی انتخابات تیاریاں شروع کردی ہیں جس کے تحت آل انڈیا مجلس اتحاد المسلمین کے صدر اسدالدین اویسی گجرات کا دورہ کر سکتے ہیں اور پارٹی کے اجتماعی جلسہ سے خطاب کر سکتے ہیں۔

اس تعلق سے آل انڈیا مجلس اتحاد المسلمین گجرات کے ترجمان دانش قریشی نے کہا کہ آل انڈیا مجلس اتحاد المسلمین کے صدر اسدالدین اویسی 15 اگست کے قریب گجرات کا دورہ کریں گے اور احمدآباد میں ایم آئی ایم کی جانب سے ہونے والے اجتماعی جلسے سے خطاب کریں گے جس کے لیے پارٹی کی جانب سے تیاریاں شروع کی جا چکی ہیں۔

کورونا وائرس کی گائیڈ لائن کے مطابق پروگرام کو منعقد کیا جائے گا، جس کے لیے پولس سے اجازت بھی مانگی گئی ہے۔ اگر پولس اجازت دے دیتی ہے تو اسدالدین اویسی احمدآباد آئیں گے اور مجلس کے کارکنان کو 2022 میں ہونے والے اسمبلی انتخابات کے تعلق سے رہنمائی کریں گے۔