ریاست بہار کے ضلع گیا میں وزیر اعلی اقلیتی روزگار قرض منصوبہ کی رقم لیکر وقت پر واپس نہیں کرنے والوں کے خلاف کارروائی کی جائےگی۔ محکمہ کی جانب سے ایسے قرض داروں پر پر ایف آئی آر درج کرنے کی تیاری کی جارہی ہے۔ پچپن قرض داروں کو نوٹس بھیجا گیا ہے۔ ضلع میں ایسے لوگوں کی تعداد تقریبا 100 ہے، جس میں 55 ایسے قرض دار ہیں، جنہوں نے برسوں سے رقم جمع نہیں کرایا ہے۔CM Minority Employment Loan in Gaya
اقلیتی مالیاتی کارپوریشن کے وکلاء کی ٹیم نے ایسے افراد کو نوٹس بھیجنا شروع کردیا ہے، اقلیتی مالیاتی کارپوریشن کے کمشنری انچارج دھرمیش کمار نے بتایا کہ جنہوں نے رقم لی، ایک دو قسط جمع کرنے کے بعد دوبارہ رقم جمع نہیں کرایا اور ان کے چیک باؤنس ہو گئے ہیں، ان پر 420 سمیت مختلف دفعات کے تحت کارروائی ہوگی۔ پہلے مرحلے میں قانونی نوٹس بھیجی جاتی ہے۔ اس کے بعد اگر جواب اور رقم قرض داروں کی جانب سے نہیں ملے تو آگے ایف آئی آر درج کرانے کے لیے محکمہ اقلیتی فلاح کے مالیاتی کارپوریشن کو رپورٹ بھیجی جاتی ہے ، منظوری کے بعد مقدمہ درج کر دیا جاتا ہے۔
اس سلسلے میں مالیاتی کارپوریشن کے وکیل شمشاد احمد نے قانونی پہلؤوں کی تفصیلی جانکاری دی اور بتایا کہ قانونی کارروائی کے لیے محکمہ کو بھی اطلاع دی گئی ہے۔ انہوں نے کہاکہ اس میں سات سال تک کی سزا ہو سکتی ہے۔ اس سے پہلے بھی کئی قرض دار جیل جا چکے ہیں حالانکہ مقدمہ ہونے کے باوجود سمجھوتہ ہونے کا راستہ ہوتا ہے اور بقایہ رقم جمع کرنے کے بعد کیس کو واپس لے لیا جاتا ہے۔
یہ بھی پڑھیں: CM Minority Employment Loan Scheme گیا میں وزیراعلی اقلیتی روزگار قرض اسکیم کے تحت سہ روزہ کیمپ
واضح رہے کہ اقلیتی مالیاتی کارپوریشن پٹنہ کے مطابق وزیراعلی اقلیتی روزگار قرض منصوبہ کے تحت تقسیم کی گئی رقم کی ریکوری کی فیصد میں، حال کے برسوں میں کمی آئی ہے۔ جس کی وجہ سے اب مالیاتی کارپوریشن نے سختی کرنا شروع کر دیا ہے۔
