ایم پی، راجستھان اور چھتیس گڑھ میں بی جے پی، تلنگانہ میں کانگریس کی حکومت - مدھیہ پردیش میں بی جے پی کو جیت کا یقین

لوک سبھا انتخابات سے ٹھیک پہلے، بھارتیہ جنتا پارٹی (بی جے پی) نے اتوار کو اپنی مقبولیت کا زبردست مظاہرہ کرتے ہوئے تین ہندی بولنے والی ریاستوں مدھیہ پردیش، راجستھان اور چھتیس گڑھ میں بڑی جیت درج کی۔ تلنگانہ سمیت چار ریاستوں کے انتخابات میں ووٹوں کی گنتی میں بی جے پی کی اہم حریف کانگریس کو راجستھان اور چھتیس گڑھ میں دھچکا لگا اور وہ ان دونوں ریاستوں میں اپنی حکومت کھو بیٹھی لیکن پارٹی نے جنوب کی ایک اہم ریاست تلنگانہ میں ایک بڑی کامیابی حاصل کی جب اس نے ریاست کے قیام کے بعد سے مسلسل 10 سال تک حکمران بھارت راشٹرا سمیتی (بی آرایس) کو اکھاڑ پھینکا۔
بی جے پی، جس نے وزیر اعظم نریندر مودی کی مقبولیت کے رتھ پر سوار ہوکر چاروں ریاستوں میں الیکشن لڑا، اس نے راجستھان اور چھتیس گڑھ میں کانگریس سے اقتدار چھین لیا اور اس بار اپنے پرانے گڑھ مدھیہ پردیش میں بے مثال کارکردگی کا مظاہرہ کیا اورپارٹی اقتدار مخالف لہر کے اندازوں کو جھٹلاتے ہوئے دوتہائی سے بھی زیادہ سیٹیں جیتنے میں کامیابی حاصل کی

جے پور: راجستھان کے وزیر اعلی اشوک گہلوت نے ریاستی اسمبلی انتخابات 2023 کے نتائج آنے کے بعد اتوار کے روز اپنے عہدے سے استعفیٰ دے دیا۔ گہلوت گورنر ہاؤس پہنچے اور گورنر کلراج مشرا کو اپنا استعفیٰ پیش کیا۔ گورنر مشرا نے استعفیٰ فوری طور پر قبول کر لیا اور گہلوت سے ریاست میں نئی ​​حکومت کی تشکیل تک کام جاری رکھنے کی تاکید کی۔ واضح رہے کہ راجستھان اسمبلی الیکشن میں بھارتیہ جنتا پارٹی (بی جے پی) کو سو سے زائد سیٹوں کے ساتھ واضح اکثریت حاصل ہوگئی ہے۔

راجستھان، مدھیہ پردیش اور چھتیس گڑھ اسمبلی انتخابات میں کامیابی حاصل کرنے کے بعد وزیر اعظم نریندر مودی دہلی میں بی جے پی کے ہیڈکوارٹر پہنچ گئے ہیں۔ جہاں وہ بی جے پی کارکنوں سے خطاب کرکے شکریہ ادا کریں گے۔

کانگریس کے رکن پارلیمنٹ راہل گاندھی نے ٹویٹ کیا کہ ہم عاجزی کے ساتھ مدھیہ پردیش، چھتیس گڑھ اور راجستھان کے مینڈیٹ کو قبول کرتے ہیں۔ لیکن نظریات کی جنگ جاری رہے گی اور میں تلنگانہ کے لوگوں کا بہت شکر گزار ہوں اور ہم بہتر تلنگانہ بنانے کا وعدہ ضرور پورا کریں گے۔

وزیر اعظم نریندر مودی نے ٹویٹ کیا کہ مدھیہ پردیش، راجستھان اور چھتیس گڑھ کے انتخابی نتائج ظاہر کرتے ہیں کہ بھارت کے لوگوں کا بھروسہ صرف گڈ گورننس اور ترقی کی سیاست پر ہے، ان کا بھروسہ بی جے پی میں ہے۔ میں ان تمام ریاستوں کے اہل خانہ کا تہہ دل سے شکریہ ادا کرتا ہوں، خاص طور پر ان ماؤں، بہنوں، بیٹیوں اور ہمارے نوجوان ووٹروں کا شکریہ ادا کرنا چاہتا ہوں جنھوں نے بی جے پی پر اپنی محبت، بھروسے اور آشیرواد کی بارش کی۔ وزیر اعظم نریندر مودی نے ایک الگ ٹویٹ میں تلنگانہ کے عوام کا شکریہ ادا کیا۔ اور لکھا کہ گزشتہ چند سالوں میں ریاست میں ہماری حمایت بڑھ رہی ہے اور یہ رجحان آنے والے وقتوں میں جاری رہے گا۔ تلنگانہ کے ساتھ ہمارا رشتہ اٹوٹ ہے اور ہم لوگوں کے لیے کام کرتے رہیں گے۔ میں بی جے پی کے ہر ایک کی محنتی کارکنوں کوششوں کی بھی تعریف کرتا ہوں۔

ریاست راجستھان کے ٹونک اسمبلی حلقہ سے کانگریس کے امیدوار سچن پائلٹ 29,475 کے فرق سے جیت گئے۔ انھوں نے کل 1,05,812 ووٹ حاصل ہوئے۔ لیکن کانگریس پارٹی ریاست میں بی جے پی سے پہت زیادہ پیچھے چل رہی ہے۔ جس کی وجہ سے اب یہ صاف ہوگیا ہے کہ ریاست راجستھان میں کانگریس کا دور ختم ہوگیا ہے۔

کانگریس کے صدر ملکارجن کھڑگے نے تلنگانہ میں کانگریس کی جیت پر ریاست کے لوگوں کا شکریہ اد کیا اور کہا کہ میں ان تمام لوگوں کا بھی شکریہ ادا کرتا ہوں جنہوں نے چھتیس گڑھ، ایم پی اور راجستھان میں ہمیں ووٹ دیا۔ کانگریس صدر نے مزید کہا کہ ان تینوں ریاستوں میں ہماری کارکردگی بلاشبہ مایوس کن رہی ہے، لیکن ہم ان تینوں ریاستوں میں اپنے آپ کو دوبارہ تعمیر کرنے اور دوبارہ زندہ کرنے کے اپنے مضبوط عزم کا اعلان کرتے ہیں۔ میں اپنے لاکھوں کارکنوں کی کوششوں کی تعریف کرتا ہوں۔ ہم عارضی نقصان پر قابو پالیں گے اور انڈیا جماعتوں کے ساتھ آنے والے لوک سبھا انتخابات کے لیے خود کو پوری طرح تیار کریں گے۔

کانگریس تلنگانہ کے انچارج مانیک راؤ ٹھاکرے کا کہنا ہے کہ آج کانگریس تلنگانہ میں حکومت بنانے جارہی ہے۔ اس میں سب سے بڑا کردار تلنگانہ کے کارکنوں اور قائدین کا ہے جس نے ہماری زبردست حمایت کی اور کانگریس کو جیت کی طرف لے گئے۔ ریاست میں کانگریس اس وقت 64 سیٹوں پر آگے چل رہی ہے۔

بی جے پی کے شیوراج سنگھ چوہان بُدھنی اسمبلی حلقہ سے ایک لاکھ سے زیادہ مارجن سے جیت درج کی اور کانگریس کے کمل ناتھ نے چھندواڑہ اسمبلی حلقہ سے 30,000 ووٹوں کے مارجن سے جیت درج کی ہے۔ ریاست مدھیہ پردیش میں بی جے پی بھاری اکثریت سے آگے چل رہی ہے۔

رائے پور: بی جے پی امیدوار اور سابق وزیر اعلیٰ ڈاکٹر رمن سنگھ نے چھتیس گڑھ کی راجنندگاؤں حلقہ سے الیکشن جیت لیا ہے۔ ڈاکٹر سنگھ نے ووٹوں کی گنتی مکمل ہونے کے بعد کانگریس امیدوار گریش دیوانگن کو تقریباً 35 ہزار ووٹوں سے شکست دی۔ اس سیٹ پر بی جے پی نے اپنی گرفت برقرار رکھی ہے۔ ڈاکٹر رمن سنگھ اس سیٹ سے مسلسل چوتھی بار منتخب ہوئے ہیں۔ انھوں نے اس سیٹ پر اب تک کے سب سے بڑے فرق سے جیت درج کی ہے۔

تلنگانہ کے وزیر اور بی آر ایس لیڈر کے ٹی آر راؤ نے کانگریس پارٹی کو ریاست میں بڑی جیت درج کرنے پر مبارکباد دیتے ہوئے کہا کہ بی آر ایس کو لگاتار دو مرتبہ حکومت دینے کے لیے تلنگانہ کے عوام کا شکر گزار ہوں۔ آج کے نتائج پر غمزدہ نہیں، لیکن یقیناً مایوسی ہوئی ہے کیونکہ یہ ہمارے توقعات کے برعکس تھا۔ کانگریس پارٹی کو بھاری اکثریت سے جیت درج کرنے پر بہت بہت مبارکباد۔ واضح رہے ریاست تلنگانہ میں اس وقت کانگریس پارٹی 64 سیٹوں پر آگے چل رہی۔

بی جے پی کے رکن پارلیمنٹ اور راجستھان کے جھوٹوارہ سے امیدوار، راجیہ وردھن سنگھ راٹھور کا کہنا ہے کہ میں پی ایم مودی کا شکریہ ادا کرتا ہوں، جو ہمارے لیڈر ہیں، میں ان بی جے پی کارکنان، جھوٹوارہ اور راجستھان کے لوگوں کا بھی شکریہ ادا کرتا ہوں جنہوں نے مجھے ایم ایل اے منتخب ہونے کے بعد راجستھان کی خدمت کرنے کا یہ موقع دیا۔ اس جیت کے لیے پی ایم مودی کی انتھک محنت ہے۔ جس اعتماد کے ساتھ ان کی اسکیمیں ہر گھر تک پہنچتی ہیں، اسی کی وجہ سے بی جے پی اتنی بڑی جیت ریاست میں درج کر رہی ہے۔

مدھیہ پردیش میں بی جے پی زبردست جیت کی طرف گامزن ہے۔ جس پر ردعمل دیتے ہوئے مدھیہ پردیش کے وزیراعلیٰ شیوراج سنگھ چوہان نے پارٹی کارکنوں سے کہا کہ یہاں حکومت مخالف کوئی لہر نہیں تھی بلکہ مدھیہ پردیش میں اقتدار کے حامی کی لہر ہے۔ ایم پی میں اس وقت بی جے پی 169 سیٹوں پر آگے چل رہی ہے، جس سے صاف ظاہر ہورہا ہے کہ بی جے پی ایک بار پھر زبردست اکثریت کے ساتھ اقتدار میں آرہی ہے۔

راجستھان میں بی جے پی کو سبقت حاصل ہونے پر بی جے پی لیڈر وسندھرا راجے سندھیا کا کہنا ہے کہ یہ جیت پی ایم مودی کے دیے گئے 'سب کا ساتھ، سب کا وشواس اور سب کا وکاس' کے منتر کی ہے اور یہ جیت پی ایم کی طرف سے دی گئی ضمانت کی جیت ہے۔ امیت شاہ کی دی گئی حکمت عملی اور نڈا جی کی فراہم کردہ قابل قیادت کی جیت ہے۔ سب سے اہم بات یہ ہے کہ یہ ہمارے پارٹی کارکنوں کی جیت ہے۔ واضح رہے کہ راجستھان کی سابق وزیراعلیٰ وسندرا راجے جھلراپٹن حلقہ اسمبلی سے 48 ہزار ووٹ سے کامیاب ہوگئی ہیں۔

تلنگانہ پردیش کانگریس کمیٹی ( ٹی پی سی سی ) کے صدر اے ریونت ریڈی نے کوڑنگل اسمبلی حلقہ سے بڑے فرق سے کامیابی حاصل کی ہے۔ ریونت ریڈی نے بھارت راشٹرا سمیتی کے موجودہ ایم ایل اے پٹنم نریندر ریڈی کو 32,800 ووٹوں سے شکست دی۔ کانگریس لیڈر کو 2018 میں کوڑنگل میں نریندر ریڈی سے 9,319 سیٹوں سے شکست ہوئی تھی۔

کرناٹک کے نائب وزیر اعلیٰ ڈی کے شیوکمار نے کہا ہے کہ تلنگانہ میں کانگریس پارٹی کی کامیابی کے پیش نظر پارٹی ہائی کمان آگے کی حکمت عملی کا تعین کرے گی۔جب میڈیا کے نمائندوں نے ان سے پوچھا کہ وہ وزیراعلی کے چندرشیکھرراو اور ان کے فرزند تارک راما راو سے کیا کہنا چاہتے ہیں تو انہوں نے اس سوال کو ٹال دیا۔ا ن کا کہنا تھا تلنگانہ کے عوام پہلے ہی اپنا جواب دے چکے ہیں۔

راجستھان کی سابق وزیراعلی وسندرا راجے جھلراپٹن حلقہ اسمبلی سے 48 ہزار ووٹ سے کامیاب ہوئی ہے۔ راجستھان میں بی جے پی کو سبقت حاصل ہورہی ہے۔

انتخابی نتائج پر بی جے پی رہنما شہزاد پونا والا نے رد عمل کا اظہار کرتے ہوئے کہا ہے کہ ’’اس کا صاف مطلب ہے کہ یہ مودی کا جادو ہے اور لوگوں نے مودی کی گارنٹی کو قبول کر لیا ہے اور کانگریس کی جعلی گارنٹی کو مسترد کر دیا ہے‘‘۔

تلنگانہ میں کانگریس کی کامیابی پر حیدرآباد میں واقع اس کے ہیڈکوارٹرس گاندھی بھون میں جشن کا ماحول دیکھاگیا۔پارٹی کے لیڈروں، کارکنوں، محبان کانگریس کی بڑی تعداد انتخابی نتائج کے ساتھ ہی جمع ہوگئی جنہوں نے بڑے پیمانہ پر جشن منایا، پٹاخے چھوڑے اور رقص کرتے ہوئے ایک دوسرے کو جیت کی مبارکباد پیش کی۔کانگریس، 2014میں تلنگانہ کی تشکیل کے بعد پہلی مرتبہ اس تلگو ریاست میں حکومت بنانے کے موقف میں آگئی ہے۔اس جشن میں پارٹی لیڈروں کا جوش دیکھنے لائق تھا جنہوں نے اس تبدیلی کو ریاست کے عوام کیلئے فال نیک قرار دیا۔کانگریس کارکنوں اور لیڈروں نے صدر تلنگانہ کانگریس ریونت ریڈی کے حق میں نعرے بازی کی۔

• ڈی جی پی تلنگانہ کی صدر تلنگانہ کانگریس ریونت ریڈی سے ملاقات

تلنگانہ میں کانگریس کی کامیابی پر ریاست کے پولیس سربراہ انجنی کمار اور دیگر اعلی عہدیداروں نے صدر تلنگانہ کانگریس ریونت ریڈی کی قیامگاہ پہنچ کر مبارکباد پیش کی اور نیک تمناوں کا اظہار کیا۔انجنی کمار نے ان کو گلدستہ بھی پیش کیا۔گزشتہ چند دنوں سے ریونت ریڈی کی شہرحیدرآباد کے جوبلی ہلز میں واقع قیامگاہ پر پولیس کی سیکوریٹی سخت کردی گئی تھی۔آج کی اس ملاقات میں ریونت ریڈی کی سیکوریٹی میں اضافہ اور دیگر امور پر تبادلہ خیال کیاگیا۔

کرناٹک کے نائب وزیراعلی ڈی کے شیوکمار نے تلنگانہ میں کانگریس کی سبقت پر رد عمل کا اظہار کرتے ہوئے کہا کہ "تلنگانہ کے لوگوں نے فیصلہ کیا ہے کہ ترقی کے لئے تبدیلی آنی چاہیے، وہ (ریونت ریڈی) پی سی سی کے صدر ہیں۔ وہ ٹیم لیڈر ہیں۔ ہماری پارٹی وزیراعلی کا فیصلہ لے گی۔ کانگریس کی جانب سے انتخاب اجتماعی قیادت پر لڑا گیا تھا، میں کے سی آر یا کے ٹی آر پر تبصرہ نہیں کرنا چاہتا، تلنگانہ کے عوام نے انہیں جواب دے دیا ہے۔

مدھیہ پردیش کے وزیر اعلی شیوراج سنگھ چوہان نے آج کہا کہ حکمراں جماعت بھارتیہ جنتا پارٹی (بی جے پی) کی سولہویں اسمبلی کی تشکیل کے لیے ہونے والے اسمبلی انتخابات کے ووٹوں کی گنتی کے رجحان میں پارٹی تاریخی اکثریت کی طرف بڑھ رہی ہے۔ یہ جیت وزیر اعظم نریندر مودی کی وجہ سے ہے۔ یہاں میڈیا سے بات چیت کے بعد چوہان نے سوشل میڈیا پر پوسٹ کرکے کہا کہ وزیراعظم نے لوگوں کے دلوں کو چھو لیا اور اسی وجہ سے یہ نتائج سامنے آرہے ہیں۔ انہوں نے کہا کہ ریاست میں ڈبل انجن سرکار اور دہلی میں وزیر اعظم کی قیادت میں مرکزی حکومت نے جو کام کیا ہے ، ہم نے اسے یہاں نافذ کیا اور یہاں بنی اسکیمیں، لاڈلی لکشمی سے لاڈلی برہمن تک کا شاندار سفر، غریب، کسان، بھانجے- بھانجیوں کے لیے کیے گئے کام نے بھی عوام کے دلوں کو چھو لیا۔

حیدرآباد کے پرانے شہر کے سات اسمبلی حلقوں میں سے مجلس چار مینار حلقہ سے کامیاب ہوئی ہے۔ دوسرے حلقوں میں ابھی ووٹنگ کی گنتی جاری ہے۔ چارمینار اسمبلی حلقہ سے مجلس کے امیدوار میر ذوالفقار علی نے بھاری اکثریت سے کامیابی حاصل کرلی ہے۔ اس طرح مجلس کو پہلی کامیابی حاصل ہوگئی ہے۔

تلنگانہ میں کانگریس کے حق میں تبدیلی کے ساتھ، پارٹی کے پرجوش کارکنان شہرحیدرآباد میں واقع جوبلی ہلز میں صدر تلنگانہ کانگریس ریونت ریڈی کی قیامگاہ پہنچے اور جشن منایا۔ ان کارکنوں نے آتش بازی کی اور ریونت ریڈی کے حق میں نعرے بازی کی۔ریونت کی رہائش گاہ پر منعقد ہونے والے جشن میں کانگریس کے لیڈران آہستہ آہستہ شامل ہو رہے ہیں۔ ریاست میں کانگریس پارٹی کی کامیابی کا قومی امکان ہے۔

تلنگانہ کے وزیر اعلی کے چندر شیکھر راؤ گجویل اسمبلی حلقہ میں بھارتیہ جنتا پارٹی کے امیدوار ایٹالہ راجندر سے827 ووٹوں سے آگے ہیں۔ الیکشن کمیشن آف انڈیا کے اعداد و شمار کے مطابق مسٹر راؤ کاماریڈی اسمبلی حلقہ میں پیچھے ہیں۔ یہاں تلنگانہ پردیش کانگریس کے صدر اے ریونت ریڈی 1720 ووٹوں سے آگے ہیں۔

مدھیہ پردیش، راجستھان، تلنگانہ اور چھتیس گڑھ اسمبلی انتخابات کی اتوار کو ووٹوں کی گنتی کے ابتدائی رجحانات میں بھارتیہ جنتا پارٹی (بی جے پی) تین ریاستوں میں اور ایک ریاست میں کانگریس آگے ہے۔ مدھیہ پردیش، راجستھان اور چھتیس گڑھ اسمبلیوں میں ووٹوں کی گنتی کے ابتدائی رجحانات میں بی جے پی نے برتری حاصل کر لی ہے۔ ابتدائی رجحانات میں تلنگانہ میں کانگریس آگے ہے۔ بی جے پی نے مدھیہ پردیش میں 143، راجستھان میں 99 اور چھتیس گڑھ میں 34 سیٹوں پر برتری حاصل کی ہے۔ کانگریس مدھیہ پردیش میں 59، راجستھان میں 77 اور چھتیس گڑھ میں 28 سیٹوں پر آگے ہے۔تلنگانہ میں کانگریس 52 سیٹوں اور بھارت راشٹرا سمیتی 29 سیٹوں پر آگے ہے۔ تلنگانہ میں بی جے پی چھ سیٹوں پر آگے ہے اور کمیونسٹ پارٹی آف انڈیا ایک سیٹ پر آگے ہے۔

تلنگانہ اسمبلی انتخابات میں اتوار کو ہونے والی ابتدائی گنتی کے بعد اپوزیشن کانگریس پارٹی 53 سیٹوں پر آگے ہے جبکہ حکمراں بھارت راشٹرا سمیتی (بی آر ایس) کے امیدوار 30 سیٹوں پر آگے ہیں۔ الیکشن کمیشن آف انڈیا کے اعداد و شمار کے مطابق بھارتیہ جنتا پارٹی (بی جے پی) 06 سیٹوں پر آگے ہے اور کمیونسٹ پارٹی آف انڈیا (سی پی آئی) ایک سیٹ پر آگے ہے۔ ریاست میں کانگریس پارٹی کے سبقت حاصل کرنے پر ریاستی صدر ریونٹ ریڈی کی رہائش گاہ کے باہر کانگریس کارکن جمع ہوگئے ہیں اور مختلف مقامات پر کانگریس کارکنوں میں جشن ماحول دیکھا جارہا ہے۔

مدھیہ پردیش کے وزیر اعلی شیوراج سنگھ چوہان نے آج کہا کہ ریاست میں بھارتیہ جنتا پارٹی (بی جے پی) حکومت بنانے جا رہی ہے۔ چوہان نے اسمبلی انتخابات کے ووٹوں کی گنتی کے سلسلے میں سوشل میڈیا ایکس پر لکھا ہے، ''بھارت ماتا کی جئے، جنتا جناردن کی جئے، آج مدھیہ پردیش اسمبلی انتخابات کے نتائج آ رہے ہیں اور مجھے یقین ہے کہ عوام کے آشیرواد اور قابل احترام وزیر اعظم جناب نریندر مودی جی کی قابل قیادت میں بھارتیہ جنتا پارٹی مکمل اکثریت کے ساتھ دوبارہ حکومت بنانے جا رہی ہے۔ بی جے پی کے تمام امیدواروں کو دل کی گہرائیوں سے مبارکباد۔ مسٹر چوہان ضلع سیہور کے بدھنی سے پارٹی کے امیدوار ہیں اور وہ وہاں کے ابتدائی رجحانات میں بھی آگے ہیں۔

چھتیس گڑھ: رجحانات میں کئی وزراء پیچھے

چھتیس گڑھ میں ووٹوں کی گنتی کے ابتدائی رجحانات میں کئی وزراء پیچھے چل رہے ہیں۔ اب تک بی جے پی اور کانگریس کے درمیان سخت مقابلہ ہے۔ ابھی تک، رجحانات میں، بھوپیش حکومت کے وزیر تمرادھواج ساہو، وزیر کاواسی لکھما، وزیر رویندر چوبے، وزیر محمد اکبر، وزیر جے سنگھ اگروال، وزیر رودر گرو پیچھے ہیں۔ 90 رکنی اسمبلی میں کانگریس 48 سیٹوں پر اور اہم اپوزیشن پارٹی بی جے پی 41 سیٹوں پر آگے ہے جبکہ ایک سیٹ پردیگرکو برتری حاصل ہے۔ بی جے پی رائے پور میں چار میں سے تین سیٹوں پر آگے ہے جبکہ بی جے پی بستر ڈویژن کی 12 میں سے آٹھ سیٹوں پر آگے ہے۔

چھتیس گڑھ میں ووٹوں کی گنتی کے ابتدائی رجحانات میں بی جے پی اور کانگریس کے درمیان سخت مقابلہ دکھائی دے رہا ہے۔ ابھی تک، رجحانات میں، کانگریس 45 سیٹوں پر اور اہم اپوزیشن پارٹی بی جے پی 44 سیٹوں پر آگے چل رہی ہے جب کہ دیگر ایک سیٹ پر آگے ہیں۔ بی جے پی رائے پور میں چار میں سے تین سیٹوں پر آگے چل رہی ہے جب کہ بستر ڈویژن کی 12 میں سے آٹھ سیٹوں پربی جے پی آگے ہے۔

مدھیہ پردیش اسمبلی انتخابات 2023 کے تحت آج ہونے والی ووٹوں کی گنتی کے ابتدائی رجحانات میں بھارتیہ جنتا پارٹی (بی جے پی) کانٹے کی ٹکر کے درمیان آگے ہے۔ تاہم، یہ صبح تقریباً 9.30 بجے تک موصول ہونے والے ابتدائی رجحانات ہیں، جن میں اہم کردار پوسٹل ووٹ کے ہیں۔ ان رجحانات کے مطابق بی جے پی 130 سے ​​زیادہ سیٹوں پر آگے ہے اور کانگریس تقریباً 90 سیٹوں پر آگے ہے۔ اس سلسلے میں وزیر اعلیٰ شیوراج سنگھ چوہان بدھنی سے، پارٹی کے جنرل سکریٹری کیلاش وجے ورگیہ اندور سے، وزیر راجندر شکلا ریوا سے اور سابق وزیر اعلیٰ کمل ناتھ چھندواڑہ سے آگے چل رہے ہیں۔

راجستھان اسمبلی انتخابات کی گنتی کے پہلے مرحلے میں بھارتیہ جنتا پارٹی (بی جے پی) کے امیدوار 100 سے زیادہ سیٹوں پر آگے چل رہے ہیں اور کانگریس کے امیدوار تقریباً 80 سیٹوں پر آگے ہیں۔

ووٹوں کی گنتی کے پہلے مرحلے میں وزیر اعلی اشوک گہلوت جودھ پور کی سردار پورہ سیٹ پر پانچ ہزار سے زیادہ ووٹوں سے آگے ہیں، سابق وزیر اعلی وسندھرا راجے تقریباً پانچ ہزار ووٹوں سے آگے ہیں، وزیر پرتاپ سنگھ کھچاریاواس اور راجندر سنگھ یادو قریب ترین حریف بی جے پی امیدوار سے آگے چل رہے ہیں جبکہ سابق نائب وزیر اعلیٰ سچن پائلٹ بتدائی رجحان میں آگے نہیں بڑھ سکے۔

اسمبلی اسپیکر ڈاکٹر سی پی جوشی چھ سے زیادہ ووٹوں سے پیچھے ہیں جبکہ کانگریس کے ریاستی صدر گووند دوتاسرا آگے ہیں۔ اس کے علاوہ اپوزیشن لیڈر راجندر سنگھ راٹھور اور ڈپٹی لیڈر آف اپوزیشن ڈاکٹر ستیش پونیا اپنے قریبی حریف امیدواروں سے نو ووٹوں سے پیچھے ہیں۔

تلنگانہ میں کانگریس پارٹی نے حیدرآباد کے ایک اسٹار ہوٹل میں بسیں تیار رکھی ہیں تاکہ اپنے اراکین اسمبلی کو ضرورت پڑنے پر بغاوت سے بچانے کے لئے بنگلورو منتقل کیا جاسکے۔ ایک نجی ٹریول آپریٹر کی بسیں تاج کرشنا ہوٹل میں دیکھی گئیں، جہاں کرناٹک کے نائب وزیر اعلیٰ ڈی کے۔ شیوکمار اور اے آئی سی سی کے دیگر مبصرین ڈیرہ جمائے ہوئے ہیں۔ مبصرین گنتی کے رجحان کی نگرانی کر رہے ہیں اور ریاستی پارٹی رہنماؤں کو ضروری ہدایات دے رہے ہیں۔ کرناٹک کے وزیر منیاپا نے میڈیا سے بات کرتے ہوئے کہا کہ کانگریس کا کوئی بھی ایم ایل اے انحراف نہیں کرے گا کیونکہ سبھی پارٹی کے وفادار ہیں۔ ڈی کے شیوکمار کابینہ کے کچھ ساتھیوں کے ساتھ جمعہ کو دیر گئے بنگلورو سے ایک خصوصی طیارے کے ذریعہ حیدرآباد پہنچے۔

مدھیہ پردیش کانگریس کے صدر کمل ناتھ نے ووٹوں کی گنتی اور ایگزٹ پولز پر کہا کہ "میں نے رجحانات نہیں دیکھے، مجھے مدھیہ پردیش کے ووٹروں پر بھروسہ ہے کہ وہ اپنا مستقبل محفوظ رکھیں گے... سیٹوں کی تعداد نہ گنیں"۰

تلنگانہ کی 119 اسمبلی سیٹوں کے لئے ووٹوں کی گنتی اتوار کی صبح 8 بجے سخت حفاظتی انتظامات کے درمیان شروع ہوئی۔ ووٹوں کی گنتی کے لیے کل 49 مراکز قائم کیے گئے ہیں جن میں سے 14 حیدرآباد ضلع میں، 04 رنگاریڈی ضلع میں اور دیگر ہر ضلع ہیڈکوارٹر میں ہیں۔ تمام گنتی مراکز ایک مضبوط تین درجاتی حفاظتی نظام سے لیس ہیں، جس میں سینٹرل آرمڈ پولیس کی تقریباً 40 کمپنیاں تعینات کی گئی ہیں۔ ریاست تلنگانہ کے دار الحکومت حیدرآباد سمیت تمام اضلاع میں ووٹوں کی گنتی کا عمل جاری ہے۔ بی آر ایس ایم ایل سی کے کویتا نے میڈیا سے بات کرتے ہوئے کہا کہ ’’ہمیں بہت یقین ہے کہ ہم تلنگانہ کے عوام کے آشیرواد سے دوبارہ جیتیں گے‘‘۔

راجستھان اسمبلی کے عام انتخابات-2023 کے ووٹوں کی گنتی اتوار کی صبح 8 بجے سخت حفاظتی انتظامات کے درمیان شروع ہوئی۔ 199 اسمبلی حلقوں کے لیے ووٹوں کی گنتی 33 ضلع ہیڈکوارٹرس کے 36 مراکز پر سخت حفاظتی انتظامات کے درمیان شروع ہوئی۔ سب سے پہلے امیدواروں اور مبصرین کے سامنے اسٹرانگ روم کھولا گیا اور پوسٹل بیلٹ کی گنتی شروع کردی گئی۔ ووٹوں کی گنتی شروع ہونے سے قبل صبح 5 بجے گنتی کارکنوں کو گنتی کی میزیں الاٹ کر دی گئیں۔

پوسٹل بیلٹ کے ذریعے چار لاکھ 66 ہزار 881 ووٹ ڈالے گئے، جن میں سے صبح 8 بجے تک موصول ہونے والے بیلٹ پیپرز کی گنتی شروع ہوئی۔ اس کے بعد الیکٹرانک ووٹنگ مشین (ای وی ایم) کے بیلٹ پیپرز کی گنتی 8.30 بجے شروع ہوگی۔ اس الیکشن میں ای وی ایم کے ذریعے 3 کروڑ 92 لاکھ 11 ہزار 399 ووٹ ڈالے گئے۔ ان میں 2 کروڑ 3 لاکھ 83 ہزار 757 مرد ووٹرز جبکہ 1 کروڑ 88 لاکھ 27 ہزار 294 خواتین ووٹرز کے ووٹ شامل ہیں۔

مدھیہ پردیش اسمبلی انتخابات 2023 کے تحت نئی حکومت کے لیے ووٹوں کی گنتی آج ریاست میں سخت سیکورٹی کے درمیان صبح 8 بجے سے شروع ہوگئی۔ ریاست کے تمام 52 ضلعی ہیڈکوارٹرز میں صبح 8 بجے سے ووٹوں کی گنتی شروع ہو گئی۔ اندازہ لگایا جا رہا ہے کہ صبح سے ہی امیدواروں کی قسمت سے متعلق رجحانات سامنے آنا شروع ہو جائیں گے۔ سرکاری معلومات کے مطابق، گنتی کے ہر دور کے نتائج ظاہر کیے جائیں گے۔ پوسٹل بیلٹ کی گنتی صبح 8 بجے سے شروع ہو گئی ہے۔ آدھے گھنٹے کے بعد ای وی ایم میں درج ووٹوں کی گنتی کی جائے گی۔ پوسٹل بیلٹس کی گنتی ختم ہونے کے بعد، ہر امیدوار کو موصول ہونے والے پوسٹل ووٹوں کا اعلان کیا جائے گا۔

چھتیس گڑھ کی تمام 90 سیٹوں کے لیے ووٹوں کی گنتی سخت حفاظتی انتظامات کے درمیان صبح 8 بجے شروع ہو گئی۔ چیف الیکٹورل آفیسر کے دفتر سے موصولہ اطلاع کے مطابق تمام 33 ضلعی ہیڈکوارٹرز میں صبح 8 بجے ووٹوں کی گنتی شروع ہوئی، کاؤنٹنگ ہال میں سب سے پہلے پوسٹل بیلٹ کی گنتی شروع کی گئی، 30 منٹ کے بعد صبح 8.30 بجے، ای وی ایم میں درج ووٹوں کی گنتی شروع ہو جائے گی۔ ای وی ایم میں درج ووٹوں کی گنتی ہر مرحلے میں 14 ٹیبل پر کی جائے گی۔ چھ اسمبلی حلقوں پنڈاریا، کوردھا، سارنگڑھ، بلائی گڑھ، کسڈول اور بھرت پور-سونہت میں 21 ٹیبلوں پر گنتی کی اجازت دی گئی ہے۔

ریاست کے تمام 90 اسمبلی حلقوں میں ووٹوں کی گنتی کے لیے 90 ریٹرننگ افسران، 416 اسسٹنٹ ریٹرننگ افسران، 4596 کاؤنٹنگ اہلکار اور 1698 مائیکرو آبزرور تقرر کیے گئے ہیں ۔اس کے ساتھ ہی الیکشن کمیشن نے 90 اسمبلی حلقوں کے لیے 90 کاؤنٹنگ آبزرور کا تقرر کیا ہے۔ گنتی کے مقامات پر تین سطحی حفاظتی انتظامات کیے گئے ہیں، جہاں ہر سطح پر شناختی کارڈ کی جانچ پڑتال کے بعد ہی داخلہ دیا جا رہا ہے۔

ملک کی چار ریاستوں مدھیہ پردیش، راجستھان، چھتیس گڑھ اور تلنگانہ میں ووٹوں کی گنتی کا آغاز ہوچکا ہے۔ چار ریاستوں میں ووٹوں کی گنتی کے مراکز پر سکیورٹی کے سخت انتظامات کیے گئے ہیں۔

تلنگانہ اسمبلی انتخابات کے نتائج پر بھارت راشٹرا سمیتی لیڈر داسوجو شراون کمار نے میڈیا سے بات کرتے ہوئے کہا کہ "یہ نہ صرف سیاسی پارٹیوں کے لیے بلکہ تلنگانہ کی پوری عوام کے لیے ایک اہم دن ہے۔ ایگزٹ پولس اور قطعی پولس میں ہمیشہ فرق ہوتا ہے۔ تلنگانہ کا موڈ کے سی آر کے حق میں ہے۔ ہمیں یقین ہے کہ وہ تیسری بار وزیر اعلی منتخب ہونے والے ہیں۔ ہمیں یقین ہے کہ بی آر ایس کو 70 نشستوں پر کامیابی حاصل ہوگی۔

ریاست تلنگانہ میں اسمبلی انتخابات کے ووٹوں کی گنتی کا جلد ہی آغاز ہوگا۔ دار الحکومت حیدرآباد میں ووٹوں کی گنتی جلد شروع ہونے کے ساتھ ہی ووٹوں کی گنتی کے مراکز میں سیکورٹی بڑھا دی گئی۔ پوری ریاست میں ووٹوں کی گنتی کے مراکز پر سکیورٹی فورسز کو تعینات کیا گیا ہے۔ گنتی کی تمام تر تیاریاں مکمل کرلی گئیں ہیں۔

قومی دار الحکومت دہلی میں کانگریس کارکن اسمبلی انتخابات کے نتائج سے قبل کانگریس کے دفتر کے باہر جمع ہوئے اور آتش بازی کی۔ کانگریس پارٹی کا دعوی ہے کہ وہ تلنگانہ، چتھیس گڑھ، راجستھان اور مدھیہ پردیش میں کامیابی حاصل کریں گی۔ تلنگانہ میں کانگریس کے صدر ریونٹ ریڈی کی رہائش گاہ پر گذشتہ روز ہی پارٹی کارکن جمع ہوئے تھے۔

کانگریس نے راجستھان، مدھیہ پردیش، چھتیس گڑھ اور تلنگانہ اسمبلی انتخابات کے نتائج کے اعلان سے قبل نو منتخب ایم ایل ایز کی میٹنگوں کو مربوط کرنے کے لیے مبصرین کو مقرر کیا ہے۔ یہ جانکاری دیتے ہوئے کانگریس جنرل سکریٹری کے سی وینوگوپال نے کہا کہ پارٹی صدر ملکارجن کھڑگے نے سینئر لیڈر بھوپیندر سنگھ ہڈا، مدھوسودن مستری، مکل واسنک اور شکیل احمد خان کو راجستھان کے لیے مبصر مقرر کیا ہے۔ انہوں نے بتایا کہ مدھیہ پردیش کے لیے ادھیر رنجن چودھری، پرتھوی راج چوہان، راجیو شکلا اور چندرکانت ہنڈور، تلنگانہ کے لیے ڈی کے شیوکمار، دیپا داس منشی، ڈاکٹر اجے کمار، کے مرلی دھرن، کے جے جارج اور چھتیس گڑھ کے لیے اجے ماکن، رمیش چنیالا اور پریتم سنگھ کو مبصر بنایا گیا ہے۔

مدھیہ پردیش کے دار الحکومت بھوپال اور دیگر علاقوں میں میں اسمبلی انتخابات کے ووٹوں کی گنتی کی تیاریاں جاری ہیں۔ جلد ہی ووٹوں کی گنتی کا آغاز ہوگا۔

ملک کی پانچ ریاستوں مدھیہ پردیش، راجستھان، چھتیس گڑھ، تلنگانہ اور میزورم میں اسمبلی انتخابات کے لئے نومبر مہینہ کی مختلف تواریخ میں ووٹنگ ہوئی جب کہ آج یعنی 3 دسمبر کو چار ریاستوں مدھیہ پردیش، راجستھان، چھتیس گڑھ اور تلنگانہ میں ووٹوں کی گنتی کی جارہی ہے، میزورم میں ووٹوں کی گنتی 4 دسمبر کو ہوگی۔