ہلاک شدہ فوجی جوانوں کو خراج عقیدت پیش

شمالی کشمیر کے ضلع کپواڑہ میں لائن آف کنٹرول پر جمعرات کو پاکستانی فائرنگ سے ہلاک ہونے والے دو فوجی اہلکاروں کو جمعہ کے روز سرینگر کے بادامی باغ فوجی چھاونی میں ایک تقریب کے دوران خراج عقیدت پیش کیا گیا۔

تقریب میں فوج کی پندرہویں کور کے جی او سی لیفٹیننٹ جنرل بی ایس راجو اور دوسرے اعلیٰ افسروں نے حصہ لیا۔

دفاعی ترجمان کرنل راجیش کالیا نے اپنے ایک بیان میں کہا کہ حوالدار کلدیپ سنگھ اور رائفل مین شبم شرما نے کپواڑہ میں ایل و سی پر پاکستانی فوج کی طرف سے جنگ معاہدے کی خلاف ورزی کا مقابلہ کرتے ہوئے اپنی جانیں قربان کیں۔

بیان میں کہا گیا کہ پنجاب کے ہوشیارپور سے تعلق رکھنے والے 37 سالہ حوالدار کلدیپ سنگھ نے 6 اگست 2002 کو فوج میں شمولیت اختیار کی تھی اور ان کے پسماندگان میں ان کی اہلیہ راجوندر کور کے علاوہ ایک بیٹا اور ایک بیٹی شامل ہیں۔

جموں سے تعلق رکھنے والے 22 سالہ شبم شرما نے 17 ستمبر 2016 میں آرمی جوائن کی تھی۔ ان کے پسماندگان میں والد شری وجے کمار شامل ہیں۔