جموں: امرناتھ یاترا2023 کے لیے رجسٹریشن کا باضابطہ طور آغاز ہو گیا۔ رجسٹریشن آف لائن اور آن لائن دونوں طریقے سے کیا جا سکتا ہے۔ حکام کا کہنا ہے کہ رواں برس امرناتھ یاترا یکم جولائی سے شروع ہونے جا رہی ہے اور یاتریوں کی پہلی کھیپ کو 30 جون کو جموں سے جھنڈی دکھا کر روانہ کیا جائے گا۔ حکام نے رواں برس یاترا 31 اگست تک جاری رکھنے کا اعلان کیا ہے۔
جموں و کشمیر لیفٹیننٹ گورنر انتظامیہ کی جانب سے 62 روز تک جاری رہنے والی امرناتھ یاترا کے لیے حفاظتی انتظامات کو بھی یقینی بنائے جانے کے حوالہ سے اقدامات شروع کر دیے گئے ہیں۔ جموں و کشمیر کے ایل جی منوج سنہا نے کہا کہ حکومت یاترا کے سفر کو ہموار اور آسان بنانے کے لیے ہر طرح کے انتظامات کر رہی ہے۔ یاترا کے آغاز سے قبل ٹیلی کام خدمات بہتر طریقے سے چلائی جائیں گی۔ وہیں امرناتھ یاتریوں کے علاج کے لیے بھی بہتر انتظامات کیے جا رہے ہیں۔
رواں برس بار یکم جولائی سے شروع ہونے والی امرناتھ یاترا کے لیے جموں و کشمیر کی 20 بینک برانچز میں آف لائن رجسٹریشن کا عمل شروع کیا گیا ہے۔ اس کے ساتھ ہی ملک بھر میں اس طرح کی 542 بینک شاخوں میں یہ عمل شروع ہو چکا ہے۔ رواں برس 62 روزہ امرناتھ یاترا کے دوران پہلی مرتبہ گپھا میں صبح اور شام کی آرتی براہ راست نشر کی جائے گی۔
رجسٹریشن کے لیے جموں کشمیر کی سرمائی دارالحکومت جموں ضلع میں چھ بینک شاخوں کی نشاندہی کی گئی ہے۔ اس کے علاوہ مسافروں کی رجسٹریشن ڈوڈہ میں 2، کٹھوعہ میں 2، راجوری، پونچھ، رام بن میں 1، ریاسی میں 2، سری نگر، ادھم پور، سانبہ میں 2 اور رام بن میں ایک ایک بینک شاخوں پر رجسٹریشن کی سہولیات مہیا رکھی گئی ہیں۔ یاتریوں کی رجسٹریشن کے لیے لازمی ہیلتھ سرٹیفکیٹ (CHC) بنانے کے لیے جموں و کشمیر کے مختلف اسپتالوں میں 164 ڈاکٹروں کو نامزد کیا گیا ہے۔ جموں و کشمیر ڈویژن میں اس کے 82-82 ڈاکٹرز ہیں۔
ڈوڈہ ضلع میں جے اینڈ کے بینک، اکھنور (جموں) میں پی این بی، ریہاری چوک 69 بی سی روڈ ریہائی جموں میں پی این بی، بخشی نگر جموں میں جے اینڈ کے بینک، گاندھی نگر جموں میں جے اینڈ کے بینک، شری امرناتھ شرائن بورڈ جے اینڈ کے بینک کے جاری کردہ شیڈول کے مطابق ٹورسٹ ریسپشن سینٹر ریذیڈنسی روڈ (جموں)، کالج روڈ کٹھوعہ میں پی این بی، بلاور (کٹھوا) میں جے اینڈ کے بینک کو نامزد کیا گیا ہے۔
پونچھ میں جے اینڈ کے بینک، رام بن میں جے اینڈ کے بینک، راجوری مین میں جے اینڈ کے بینک، ہوٹل امبیکا کٹرا جموں میں پی این بی بینک، مین بازار ریاسی میں پی این بی بینک، وارڈ 2 نیشنل ہائی وے سانبہ میں پی این بی بینک، کرن نگر سری نگر میں جے اینڈ کے بینک، کورٹ کمپلیکس ادھم پور میں جے اینڈ کے بینک، ہری مارکیٹ جموں میں ایس بی آئی بینک میں بھی رجسٹریشن کی جا سکتی ہے۔
اسی طرح پہاڑی ضلع رام بن میں ایس بی آئی بینک، ڈی سی آفس کے قریب ڈوڈہ میں ایس بی آئی بینک، نیشنل ہائی وے سانبہ پر ایس بی آئی بینک پر بھی رجسٹریشن کی سہولت میسر ہے۔ لازمی ہیلتھ سرٹیفکیٹ کے لیے پیر سے ہی یاتریوں کے جموں کے سروال اور گاندھی نگر اسپتال پہنچنے کی امید ہے۔ امرناتھ یاترا کے لیے 13 سے 70 سال کی عمر کے لوگ اپنا اندراج کروا سکتے ہیں۔ چھ ہفتے یا اس سے زیادہ حاملہ خواتین کو امرناتھ یاترا کی اجازت نہیں ہے۔ آن لائن رجسٹریشن کے لیے ویب سائٹ https://jksasb.nic.in پر جا سکتے ہیں۔
نامزد بینک شاخوں کی فہرست شری امرناتھ یاترا شرائن بورڈ (SASB) کی ویب سائٹ https://jksasb.nic.in پر دستیاب ہے۔ مزید معلومات کے لیے مسافر ٹول فری نمبر 18001807198/18001807199 پر رابطہ کر سکتے ہیں۔ اس بار امرناتھ یاترا کے لیے کل 31 بینکوں میں رجسٹریشن کرائی جا سکتی ہے۔ رجسٹریشن پنجاب نیشنل بینک کی کسی بھی برانچ میں کی جائے گی۔ میڈیکل اور رجسٹریشن کے لیے بہت سی دستاویز کو لازمی قرار دیا گیا ہے جس کے بغیر سفر ممکن نہیں۔
