چھپرا: بہار کے ضلع سارن سے موب لنچنگ کا معاملہ سامنے آیا ہے۔ کل رات ایک ٹرک ڈرائیور کو ہجوم نے پیٹ پیٹ کر ہلاک کر دیا۔ جب کہ ٹرک کے خلاصی نے بھاگ کر اپنی جان بچائی۔ واقعے کی اطلاع ملتے ہی پولیس موقع پر پہنچی اور لاش کو اپنی تحویل میں لے کر پوسٹ مارٹم کے لیے اسپتال بھیج دیا ہے۔ فی الحال پولیس پورے معاملے کی جانچ کررہی ہے۔ واقعے کے بعد سے علاقے میں کشیدگی کا ماحول ہے۔ معاملہ تھانہ جلالپور کا ہے۔
واقعے کے حوالے سے بتایا جاتا رہا ہے کہ جلال پور تھانہ علاقے کھوری پاکڑ علاقے سے گزرنے والے ٹرک کا اچانک بریک خراب ہوگیا، جس کے بعد ڈرائیور ٹرک کی مرمت میں لگ گیا، تبھی آس پاس موجود لوگوں نے ڈرائیور سے ٹرک میں لدے سامان کے بارے میں پوچھنے لگے۔ جیسے ہی لوگوں کو معلوم ہوا کہ ٹرک میں جانوروں کی ہڈیاں لدی ہیں، مشتعل ہجوم نے ڈرائیور ظہرالدین کو پیٹ پیٹ کر ہلاک کردیا۔
ہڈی کارخانے کے مالک حیدر نے بتایا کہ گاڑی میں کچھ خرابی پیدا ہوگئی تھی۔ اسی درمیان لوگوں کا ہجوم وہاں پہنچا اور گاڑی میں توڑ پھوڑ کی۔ اس کے بعد موقع پر پولیس بھی پہنچ گئی، ہجوم نے ڈرائیور کو پولیس کے سامنے پیٹ پیٹ کر قتل کردیا۔"
ہنگامہ کے دوران ٹرک خلاصی بھاگ کر جان بچانے میں کامیاب رہا، لیکن ڈرائیور ظہرالدین کی ایک ٹانگ چوٹ کی وجہ سے وہ بھاگ نہیں سکے اور ہجوم کے ہاتھوں قتل کردیے گئے۔ ہجوم نے انہیں پیٹ پیٹ کر ہلاک کر دیا۔ متوفی کی شناخت 55 سالہ ظہرالدین ولد غلام رسول ساکن گورا او پی تھانہ کے گاؤں مجھولیہ کے طور پر کی گئی ہے۔ واقعہ کی اطلاع ملتے ہی ایس ڈی ایم صدر سنجے رائے اور ڈی ایس پی صدر موقع پر پہنچے اور معاملے کی جانچ شروع کردی۔
