شمالی کشمیر، ضلع بارہمولہ کے سوپور قصبہ کے دور دراز علاقہ یمبرزل واری اور مربل میں محکمہ باغبانی کی جانب سے یک روزہ تربیتی و بیداری کیمپ کا انعقاد کیا گیا۔ جس میں زنگیر حلقہ کے مختلف علاقوں کے کسانوں نے شرکت کی۔
اس موقع پر بارہمولہ کے چیف ہارٹیکلچر ظہور احمد نے بتایا کہ آج کے پروگرام کا مقصد کسانوں کو محکمہ باغبانی کی مختلف اسکیموں کے متعلق معلومات فراہم کرنا ہے۔
انہوں نے بتایا کہ اس علاقے کی زمین کافی زیادہ زرخیز ہے اور اس وقت یہاں صرف سیب اور اخروٹ کی پیداوار ہوتی ہے لیکن ہم ان کو ناشپاتی، چیری، آلوبخارا اور انگور کی کاشتکاری کی بھی تربیت دے رہے ہیں جس کی وجہ سے مستقبل میں روزگار کے کافی زیادہ وسائل پیدا ہوسکتے ہیں۔
انہوں نے مزید بتایا کہ اس پہاڑی علاقے میں پانی کی شدید قلت بھی ہے لیکن ہم ان کو بورویل جیسی سہولیات فراہم کریں گے تاکہ یہاں کے کسانوں کو کسی بھی قسم کی کوئی پریشانی نہ ہو۔
مقامی لوگوں نے محکمہ باغبانی کی جانب سے تربیتی اور بیداری پروگرام کا انعقاد کرانے پر شکریہ ادا کیا۔
