جموں و کشمیر، ضلع بانڈی پورہ بی جے پی کی جانب سے اہم اور بڑے مذہبی مقامات کو سینیٹائز کرنے کی مہم شروع کی ہے جس کے تحت علاقے کے متعدد مذہبی مقامات کو سینیٹائز کیا گیا۔
اس موقع پر شری امرناتھ یاترا ویلفیئر سوسائٹی انچارج و بی جے پی لیڈر تفضل وانی، بی جے پی انچارج نارتھ کشمیر مدثر صالب اور آفس انچارج بی جے پی بانڈی پورہ عادل بہرو کی نگرانی میں مشہور سلطان عارفین کے آستانہ عالیہ واقع اہم شریف بانڈی پورہ، ہندو مندر واقع آجر بانڈی پورہ، گرودوارہ وارڈ نمبر دو بانڈی پورہ اور زیارت گاہ حضرت پیر جناب غوث اعظم دستگیر وارڈ نمبر دو بانڈی پورہ کو سینیٹائز کیا گیا۔
بی جے پی کارکنان کا کہنا ہے کہ دراصل مذہبی مقامات کو سینیٹائز کرنے کی مہم بی جے پی کے صدر رویندر رینا اور جنرل سکریٹری اشوک کول کی ہدایت پر شروع کی گئی ہے۔
انہوں نے کہا کہ دراصل اس ڈرائیو کا مقصد عقیدت مندوں اور عبادت کرنے والوں کو وبا سے محفوظ رکھا جاسکے اور آئندہ بھی ایسے ہی اہم مقامات کو سینیٹائز کرنے کا عمل جاری رہے گا۔
اس موقع پر انھوں نے عوام سے اپیل کرتے ہوئے کہا کہ مذہبی مقامات کے ساتھ ساتھ دیگر جگہوں پر بھی ایس او پیز پر عمل کر کے کورونا وائرس کو روکنے میں مدد کریں۔ انہوں نے اس مہم میں مکمل تعاون دینے پر میونسپل کونسل بانڈی پورہ کا بھی شکریہ ادا کیا۔
