بانڈی پورہ سمل ہسپتال میں منگل کے روز ایک خاتون کے ساتھ پیش آئے واقعے کے حوالے سے ضلع ترقیاتی کمشنر نے کہا کہ ہم نے اس مسئلے کو بڑی سنجیدگی سے لیتے ہوئے ایک اعلیٰ سطحی تحقیقاتی ٹیم تشکیل دی ہے۔ جس کی بہت جلد رپوٹ ائے گی اس کے بعد لاپرواہی برتنے والے ملازم کے خلاف سخت کارروائی کی جائے گی۔
خیال رہے کہ شمالی کشمیر کے ضلع بانڈی پورہ کے نوگام سوناواری میں ہسپتال عملے کی لاپروائی کی وجہ سے ایک حاملہ خاتون کو کئی گھنٹوں تک نیو ٹائم پرائمری ہیلتھ سینٹر (این ٹی پی ایچ سی) کے اندر تالہ بند کر کے رکھا گیا۔ جب کہ ہسپتال کا سارا عملہ نکل چکا تھا۔
ہسپتال میں زیر علاج خاتون اور اس کے ساتھ ان کے ایک تیمار دار کو جب یہ محسوس ہوا کہ وہاں پر کوئی موجود نہیں ہے تو انہوں نے خود باہر نکلنے کی کوشش کی لیکن انہوں نے وہاں پر تالا لگا ہوا پایا۔ جس کے بعد انہوں نے اپنے گھر والوں کو فون پر یہ اطلاع دی۔
یہ بھی پڑھیں:بانڈی پورہ: مریض ہسپتال میں مقفل
ادھر مقامی لوگوں کو جب اس بات کی خبر ہوئی تو فوراً ہسپتال کے باہر مقامی لوگ جمع ہوگئے اور احتجاجی مظاہرہ کیا۔ اس دوران انہوں نے متعلقہ ہسپتال کے عملے کے خلاف سخت کارروائی کا مطالبہ کیا۔
