ضلع صدر مقام اننت ناگ سے محض دس کلو میٹر دور ونتراگ علاقے میں سڑک اور بجلی جیسی بنیادی سہولیات کی عدم دستیابی کے سبب لوگوں نے انتظامیہ کے تئیں ناراضگی کا اظہار کرتے ہوئے احتجاج کیا۔
علاقے میں سڑک کی خستہ حالی، بجلی کے ابتر ترسیلی نظام کے علاوہ مقامی باشندوں نے صحت عامہ کے حوالے سے بھی شکایات کیں۔
مقامی باشندوں نے انتظامیہ کو تنقید کا نشانہ بناتے ہوئے کہا: ’’ونتراگ میں تعمیر وترقی اور بنیادی ضروریات بہم پہچانے کے صرف بلند و بانگ دعوے کیے جاتے ہیں تاہم زمینی سطح پر ایسا کچھ بھی دیکھنے کو نہیں ملتا۔‘‘
انہوں نے کہا کہ ’’بنیادی سہولیات کی عدم دستیابی کے سبب مقامی باشندے انتہائی کسمپرسی کی زندگی گزار رہے ہیں۔‘‘
ای ٹی وی بھارت کے ساتھ بات کرتے ہوئے مقامی باشندوں نے بتایا کہ سڑک جیسی بنیادی ضرورت نہ ہونے کے سبب علاقہ برفباری کے ایام میں بیرون دنیا سے پوری طرح منقطع ہو جاتا ہے۔
انہوں نے مزید کہا کہ صحت عامہ کے حوالے سے بھی علاقے کو نظر انداز کیا گیا ہے۔ انہوں کے کہا کہ علاقے میں قائم ڈسپنسری میں ڈاکٹروں کی تعینانی عمل میں نہیں لائی جاتی جس کے سبب معمولی طبی معائنے کے لیے لوگوں کو طویل مسافت طے کرنا پڑتی ہے۔
مزیر پڑھیں: بجبہاڑہ: ڈسپنسری کو اپگریڈ کیے جانے کا مطالبہ
مقامی باشندوں نے بتایا کہ ایمرجنسی خاص کر درد زہ میں مبتلا خواتین کو علاج کے لیے ضلع اسپتال پہنچانا پڑتا ہے جو بسا اوقات خطرناک ثابت ہو سکتا ہے۔
انہوں نے مزید کہا کہ ’’سرکار نے ونتراگ علاقے کو نظر انداز کیا ہے، آج کے اس جدید دور میں بھی ہمیں بنیادی سہولیات نہ ہونے کے باعث مشکلات سے دوچار ہونا پڑتا ہے، علاقے میں بجلی کا ترسیلی نظام بھی بحرانی صورتحال کا شکار ہے۔‘‘
مزید پڑھیں: اننت ناگ: آوارہ مویشیوں سے راہگیر پریشان
انہوں نے دعویٰ کیا کہ ’’انتظامیہ کے اعلیٰ افسران سمیت منتخب عوامی نمائندے بھی علاقے کا صرف دورہ کرتے ہیں جبکہ عوام کو بنیادی ضروریات فراہم کرنے کے لیے سنجیدہ اقدامات نہیں اٹھائے جا ر ہے۔‘‘
احتجاج کر رہے مقامی باشندوں نے ضلع انتظامیہ سے علاقے کی جانب توجہ دینے اور رہائشیوں کو بنیادی سہولیات فراہم کرنے کی اپیل کی ہے۔
