جموں و کشمیر، ضلع اننت ناگ کے حلقہ انتخاب بجبہاڑہ میں کچن گارڈن کو فروغ دینے کے لیے آج ایک مہم چلائی گئی، جس کے تحت محکمہ زراعت نے کچن گارڈن بجبہاڑہ میں مختلف سبزیوں کے بیج کو فروخت کرنے کی شروعات کی ہے۔
بیجوں کے فروخت کی مہم کو سب ڈویژنل مجسٹریٹ بجبہاڑہ ، سلیم جہانگیر اور چیف ایگریکلچر آفیسر ڈاکٹر سید وسیم احمد شاہ اور دیگر عہدیداروں کی موجودگی میں شروع کیا گیا۔
اس موقع پر سلیم جہانگیر نے کہا کہ " اس مہم سے توقع کی جارہی ہے کہ مختلف سبزیوں کی مختلف اقسام کے تقریباً 2.0 لاکھ بیجوں کو 9.3 ہیکٹر رقبے پر تقسیم کیا جائے گا، جس کا تخمینہ تقریبا 97.86 لاکھ روپے ہوگا''۔
وہیں سی اے او ڈاکٹر وسیم نے کہا کہ محکمہ زراعت کی جانب سے کچن گارڈن کو فروغ دینے کے لیے کم نرخوں پر اعلی معیار کے بیج اور پودے فراہم کیے جائیں گے، انہوں نے مزید کہا کہ "اس اقدام سے لوگوں کو حوصلہ ملے گا کہ وہ اس طرح کی سرگرمیوں کو اپنی عادت بنائیں گے، جس سے ان کی صحت ٹھیک رہے گی اور معیشت میں ترقی بھی ہوگی''۔
