ضلع اننت ناگ میں کوکرناگ کے چکہ گوہن علاقے کے باشندوں نے شکایت کی ہے علاقے میں قائم گورنمنٹ مڈل اسکول کی عمارت محض دو کمروں پر مشتمل ہے، جس کے سبب طلبہ کو درس و تدریس میں کافی دقتوں کا سامنا کرنا پڑ رہا ہے۔
کوکرناگ: گورنمنٹ مڈل اسکول میں بنیادی سہولیات کا فقدان مقامی باشندوں کے مطابق طلبہ کے لئے کھیل کود کی سرگرمیوں کے لئے میدان یا پلے فیلڈ بھی نہیں ہے، جس کی وجہ سے اسکولی بچے ڈپریشن کے شکار ہو رہے ہیں۔
لوگوں کا کہنا ہے کہ علاقے میں کئی سال قبل اسکول کے لیے محض دو کمرے تعمیر کیے گئے، جہاں درس و تدریس کے نظام کا بنیادی ڈھانچہ نہ ہونے کے باعث طلبہ کو کئی مشکلات سے دوچار ہونا پڑتا ہے۔
ای ٹی وی بھارت کے ساتھ بات کرتے ہوئے مقامی باشندوں نے کہا کہ بنیادی ڈھانچے کی عدم دستیابی کی وجہ سے بیشتر اوقات طلبہ اسکول کے چھوٹے سے احاطے میں تعلیم حاصل کرنے پر مجبور ہو جاتے ہیں اور ’’خراب موسم کی صورتحال میں طلبہ پڑھائی حاصل کرنے سے قاصر رہتے ہیں، جبکہ بارشوں کے ایام میں مجبوراً اسکول انتظامیہ کو درس و تدریس معطل کرنا پڑتا ہے۔‘‘
مزید پڑھیں: اننت ناگ:اینٹ کی قیمتوں میں اضافہ سے لوگ پریشان
انہوں نے دعویٰ کیا کہ کئی بار یہ مسئلہ متعلقہ محکمہ کی نوٹس میں لایا گیا تاہم آج تک عوام کے مطالبے پر کسی نے کوئی غور نہیں کیا۔
انہوں نے انتظامیہ سے گزارش کی ہے کہ ان کے اس دیرینہ مطالبہ پر غور کیا جائے تاکہ بچوں کا تعلیمی مستقبل محفوظ رہ سکے۔
