نئی دہلی: وزیر اعظم نریندر مودی نے پیر کے روز ترکیہ اور آس پاس کے علاقوں میں آنے والے زبردست زلزلے میں جانی نقصان پر افسوس کا اظہار کیا۔ پی ایم مودی نے ٹویٹ کیا کہ ترکیہ میں زلزلے کی وجہ سے انسانی جانوں کے ضیاع اور املاک کے نقصان پر غمزدہ ہوں اور سوگوار خاندانوں کو تعزیت پیش کرتا ہوں اور زخمیوں کی جلد صحت یابی کے لیے دعا گو ہوں۔ انھوں نے مزید لکھا کہ کہ بھارت اس سانحہ کے وقت ترکیہ کے لوگوں کے ساتھ یکجہتی کے ساتھ کھڑا ہے اور اس سانحے سے نمٹنے کے لیے ہر ممکن مدد فراہم کرنے کے لیے تیار ہے۔
مزید برآں، وزیر خارجہ ایس جے شنکر نے بھی ٹویٹ کیا اور ترکیہ و شام دونوں کو ہلا دینے والے المناک زلزلے میں جانی نقصان پر دکھ کا اظہار کیا۔ انہوں نے اپنے ترک ہم منصب کو اپنی حمایت کا اظہار کرتے ہوئے ٹویٹر پر لکھا کہ ترکیہ میں زلزلے میں جانوں کے ضیاع اور نقصان سے دلی دکھ ہوا۔
امریکی قومی سلامتی کے مشیر نے ٹویٹر پر زلزلہ سے متاثرہ ملک ترکیہ کے لیے بروقت مدد کی یقین دہانی کرائی ہے۔انہوں نے ٹویٹ کیا، امریکہ کو ترکیہ اور شام میں آج کے تباہ کن زلزلے پر گہری تشویش ہے۔ میں ترک حکام کے ساتھ رابطے میں ہوں تاکہ یہ بتایا جا سکے کہ ہم ترکی کے ساتھ ہر طرح کی مدد فراہم کرنے کے لیے تیار ہیں۔
واضح رہے کہ ریکٹر اسکیل پر 7.8 کی شدت کے زلزلے کے بعد ترکیہ اور شام میں 500 سے زائد افراد ہلاک اور تقریباً 3000 دیگر زخمی ہو گئے۔ ترکیہ کے شہر غازیانتپ کے قریب 17.9 کلومیٹر کی گہرائی میں صبح 4.17 بجے آنے والے طاقتور زلزلے کے جھٹکے لبنان اور قبرص میں بھی محسوس کیے گئے۔ دونوں پڑوسی ممالک کے حکام کو ہلاکتوں میں اضافے کا خدشہ ہے کیونکہ کئی عمارتیں منہدم ہو گئی ہیں جن کے ملبے کے ڈھیر میں ابھی بھی بہت سے افراد دبے ہوئے ہیں جن کو زندہ بچانے کے لیے ریسکیو ٹیمیں تعینات ہیں۔
