شمالی کشمیر کے ضلع بانڈی پورہ کے سمبل سوناواری میں پولیس اور عوام کے درمیان دوستانہ تعلقات کو مضبوط کرنے کی غرض سے "پولیس پبلک دربار" کا اہتمام کیا گیا۔
بانڈی پورہ پولیس کی جانب سے منعقدہ اس پروگرام میں سوناواری علاقے سے تعلق رکھنے والے عوامی نمائندے، ٹریڈرس فیڈریشن کے لیڈر اور پنچ سرپنچوں کے علاوہ عام لوگوں کی ایک بڑی تعداد نے بھی شرکت کی۔
یہ اجلاس ایس ڈی پی او سمبل شری سریندر موہن کی صدارت میں منعقد ہوا جن کے ہمراہ پولیس تھانہ سمبل کے ایس ایچ او محمد سلیم کے علاوہ میونسپل کمیٹی سمبل کے چیئرمین جہانگیر احمد بھی تھے۔
اس دوران پولیس نے بتایا کہ مختلف سماجی برائیوں کا خاتمہ کرنے کے لیے باہمی تال میل کی ضرورت ہے اور ان سماجی برائیوں کا خاتمہ تبھی کیا جاسکتا ہے جب عوام اور پولیس کے درمیان دوستانہ تعلقات قائم ہوں گے۔
اس کے علاوہ پولیس نے شرکا کو یقین دلایا کہ بانڈی پورہ پولیس منشیات اور دیگر معاشرتی جرائم کے خاتمے کے علاوہ امن و استحکام کو برقرار رکھنے کے لیے ان علاقوں کے عوام کے ساتھ کندھے سے کندھا ملا کر کام کرے گا۔
پولیس نے لوگوں سے اس بات کی بھی تلقین کی کہ وہ کورونا وائرس پر قابو پانے کے لیے حکومت کے تمام رہنما خطوط اور ایس او پیز پر سختی سے عمل کریں۔
