جنوبی ضلع اننت ناگ کے حلقہ انتخاب کوکرناگ کے ایک دور افتادہ اچھو گڈول نامی علاقے میں سات نابالغ بچوں کے والدین نے اپنے بھائی پر الزام لگایا کہ ان کے بچوں کو ان کے چچا نے منگل کے روز اچھو گڈول علاقے میں ان کی رہائش گاہ پر زہر دے دیا، والدین کا الزام ہے کہ ان کے چچا نے پانی کے برتن میں زہریلی شے ملائی تھی، جس کو پینے کے بعد سارے بچے بے ہوش ہوگئے، جس کے بعد والدین نے بچوں کو ہسپتال منتقل کیا، والدین کا الزام ہے کہ چچا نے یہ سب جائیداد کے تنازعہ کو لے کر کیا۔ Uncle Allegedly Poisons 7 Minors in Anantnag
گورنمنٹ میڈیکل کالج کے ذرائع کے مطابق سات بچوں کے زہر پینے کے بعد اسپتال میں داخل کرایا گیا ہے، تاہم جی ایم سی سے انہیں شیرباغ اننت ناگ کے زچہ بچہ (میٹرنٹی اینڈ چائلڈ کیئر) ہسپتال منتقل کیا گیا، بتایا جا رہا ہے کہ ساتوں بچے خطرے سے باہر ہیں، جن کی پہچان محمد الطاف چوہان 11سال، زبیر احمد چوہان 15 سال، مدثر احمد 7 سال، مشتاق احمد 6 سال، شکیل احمد 5 سال، شمیمہ جان 9 سال، عارفہ 8 سال ولدیت محمد حسین چوہان ساکن اچھو گڈول کے طور ہوئی ہے۔
بتا یا جا رہا ہے کہ اچھو گڈول نامی علاقے میں منگل کی شام سات بچوں نے نزدیکی جنگل میں کچھ جڑی بوٹی کھا لی، جس کے بعد انہیں پیاس کی شدت محسوس ہوئی، گھر پہنچتے ہی ساتوں بچوں نے اپنے چچا سے پانی مانگا، جس کے بعد سارے بچے بے ہوش ہوگئے، جنہیں بےہوشی کی حالت میں سب ضلع ہسپتال کوکرناگ پہنچایا گیا، جہاں سے انہیں بہتر علاج کی غرض سے گورنمنٹ میڈیکل کالج منتقل کیا گیا۔ جب کہ پولیس نے اس معاملے میں کیس درج کر کے چھان بین شروع کی ہے، پولیس واقعے کی تحقیقات کر رہی ہے، پولیس نے پانی کو ایف ایس ایل میں جانچ کے لیے بھیج دیا ہے، ایف ایس ایل کی رپورٹ ملتے ہی پولیس معاملے کی مزید چھان بین کرے گی۔
