گورنمنٹ میڈیکل کالج اننت ناگ کے احاطہ کو کار پارکنگ کے لئے استعمال کیا جارہا تھا جس کے سبب مریضوں اور تیمارداروں کو کافی مشکلات کا سامنا کرنا پڑرہا تھا۔ ہسپتال کے احاطہ میں سینکڑوں گاڑیاں موجود رہنے سے چلنے پھرنے کی گنجائش کافی کم ہوگئی تھی۔ اس کے نتیجہ میں بیماروں کو ہسپتال میں داخل کرنے اور انہیں سرینگر ریفر کرنے کے دوران مشکلات پیش آرہی تھیں۔
اس تعلق سے چند روز قبل ای ٹی وی بھارت نے ایک خبر نشر کی تھی، جس کے بعد جی ایم سی انتظامیہ گورنمنٹ میڈیکل کالج اننت ناگ کے احاطے سے پارکنگ ہٹاکر کہیں دوسری جگہ شفٹ کرنے پر غور کررہی ہے۔
جی ایم سی کے پرنسپل ڈاکٹر سید طارق قریشی نے کہا کہ 'گاڑیوں کی بڑھتی تعداد کو دیکھتے ہوئے، جی ایم سی نے پارکنگ کے لئے ایک دوسری جگہ کا انتخاب کیا ہے جس پر جلد ہی کام شروع کیا جائے گا۔
انہوں نے کہا کہ جلد ہی پارکنگ تیار کی جائے گی، جس کے بعد گاڑیوں کو گورنمنٹ میڈیکل کالج اننت ناگ کے احاطہ میں پارک کرنے کے بجائے وہاں منتقل کیا جائے گا۔ تاکہ ہسپتال آنے والے افراد کو مشکلات کا سامنا نہ کرنا پڑے۔
مزید پڑھیں: جی ایم سی کا صحن کار پارکنگ میں تبدیل
آپ کو بتادیں کہ گورنمنٹ میڈیکل کالج اننت ناگ جنوبی کشمیر کے ایک وسیع علاقہ سمیت خطہ چناب کے علاقوں کے مریضوں کی ضرورتوں کو بھی پورا کرتا ہے۔ اس کے سبب ہسپتال میں روزانہ کافی بھیڑ رہتی ہے۔ ضلع ہسپتال اننت ناگ میں ایسوسی ایٹ ہسپتال بناکر اسے گورنمنٹ میڈیکل کالج میں تبدیل کیا گیا ہے ساتھ ہی اسے جدید سہولیات سے لیس کیا گیا، لیکن انتظامیہ کی جانب سے جی ایم سی کی بیرونی جگہ پر توجہ نہیں دی جارہی تھی جس پر اب انتظامیہ نے غور کرنے کی یقین دہانی کرائی ہے۔
