آج ڈاکٹروں کا قومی دن ہے۔ اس موقع پر وزیراعظم نریندر مودی ملک کی طبی دنیا سے وابستہ لوگوں سے سہ پہر تین بجے خطاب کریں گے۔ جس میں پی ایم کووڈ۔19 کے خلاف جنگ میں ڈاکٹروں کی خدمات پر روشنی ڈال سکتے ہیں۔
اس موقع پر وزیراعظم نریندر مودی نے تمام ڈاکٹروں کو مبارکباد پیش کرتے ہوئے ٹویٹ کیا کہ ڈاکٹرز ڈے کے موقع پر تمام ڈاکٹروں کو میری جانب سے مبارکباد۔ طب کی دنیا میں بھارت کی پیش قدمی قابل تعریف ہے اور اس نے ہمارے گھر کو صحت مند بنانے میں اہم کردار ادا کیا ہے‘‘۔
وزیر اعظم نے ٹویٹ کے ساتھ اپنے’من کی بات‘ پروگرام کی ایک ویڈیو بھی شیئر کی ہے جس میں انہوں نے ڈاکٹروں کے تعاون و خدمات کے بارے میں اپنے خیالات بھی شیئر کیے ہیں۔
یہ بھی پڑھیں؛ National Doctor’s Day: صحت مند معاشرے کی تشکیل کرنے والے محسن
اس کے علاوہ وزیر داخلہ امت شاہ نے بھی ٹویٹ کرکے اس موقع پر ڈاکٹروں کو مبارک باد دی ہے، امت شاہ نے ٹویٹ کیا کہ ’’ڈاکٹر بننا انسانیت کی خدمت کا بہرتین موقع ہوتا ہے۔ انھوں نے مزید لکھا کہ ڈاکٹر کے قومی دن کے موقع پر ہم اپنے بہادر ڈاکٹروں کی بہادری کی کاوشوں کو سلام پیش کرتے ہیں، جنھوں نے کسی بھی طرح کی مشکلات سے قطع نظر انسانیت کی خدمت میں کوئی کسر نہیں چھوڑی، ہم بار بار صحت مند معاشرے کے لیے ان کی بے لوث کوششوں کا مشاہدہ کرتے رہے ہیں۔
واضح رہے کہ ڈاکٹر بیدھان چندر رائے کا یوم پیدائش اور یوم وفات دونوں یکم جولائی کو ہی ہے لہذا اس دن کو ان کے اعزاز میں منایا جاتا ہے۔ نیشنل ڈاکٹرز ڈے منانے کا مقصد لوگوں کو اس دن ڈاکٹرز کی اہمیت کے بارے میں آگاہ کیا جانا ہوتا ہے۔ ساتھ ہی زندگی میں ڈاکٹرز کے تعاون کو سراہا جاتا ہے۔ یہ خصوصی دن ان تمام ڈاکٹرز اور صحت کے کارکنوں کے لئے وقف ہے جو اپنی جان خطرے میں ڈال کر لوگوں کی خدمت کر رہے ہیں۔
