جھیل وولر میں 4 سے 5 لاکھ مہمان پرندے آچکے ہیں

وادی کشمیر میں خشک موسمی صورتحال کے باعث گرچہ یہاں غیر مقامی سیاح مایوس نظر آرہے ہیں تاہم یہاں کی مشہور آبگاہوں کے خاموش اور پر سکون پانی پر ہزاروں کی تعداد میں مہمان پرندے موجود بود و باش کر رہے ہیں۔بارہمولہ اور بانڈی پور اضلاع پر پھیلے مشہور جھیل وولر میں رواں موسم سرما کے دوران فی الوقت 4 سے 5 لاکھ مہاجر پرندے آ چکے ہیں اور ان مہمان پرندوں میں 7 نئی نسلیں بھی شامل ہیں۔

وولر کنزرویشن اینڈ منیجمنٹ اتھارٹی کے کوارڈینیٹر عرفان رسول نے  اس حوالے سے بتایا کہ اس وقت جھیل، نقل مکانی کرنے والے پرندوں سے بھری ہوئی ہے اور آئے روز مختلف ممالک اور پڑوسی آبگاہوں سے مہاجر پرندوں کے جھنڈ یہاں آ رہے ہیں۔انہوں نے کہا وادی میں جاری خشک موسمی صورتحال کی وجہ سے پڑوسی آبگاہوں جیسے ہائیگام، ہوکرسر، اور شالہ بگ میں پانی کی سطح انتہائی کم ہونے سے مہمان پرندے یہاں آئے ہیں، جس کے بعد جھیل کے گردو نواح  سخت چوکسی بڑھائی دی گئی ہے۔