کولکاتا: مغربی بنگال کے گورنر سی وی آنند بوس نے جمعرات کو ممتا بنرجی کے ریمارکس پر تنقید کی تھی۔ بوس نے کہا تھا کہ عوامی نمائندوں سے توقع کی جاتی ہے کہ وہ 'غلط اور قابل مذمت تاثر' پیدا نہیں کریں گے۔ ذرائع نے بتایا کہ بنگال کے گورنر نے ترنمول کانگریس (ٹی ایم سی) کے کچھ دیگر قائدین کے خلاف بھی اسی طرح کے تبصرے کرنے پر ہتک عزت کا مقدمہ دائر کیا ہے۔
مقدمہ کیوں درج کیا گیا؟
غور طلب ہے کہ جمعرات کو ریاستی سکریٹریٹ میں منعقدہ ایک انتظامی میٹنگ کے دوران ممتا بنرجی نے دعویٰ کیا تھا کہ کچھ خواتین نے انہیں بتایا تھا کہ راج بھون میں حالیہ واقعات کی وجہ سے وہ وہاں جانے سے ڈرتی ہیں۔ ذرائع کے مطابق گورنر سی وی آنند بوس نے جمعہ کو کلکتہ ہائی کورٹ میں ٹی ایم سی سربراہ اور ان کی پارٹی کے رہنماؤں کے خلاف ہتک عزت کا مقدمہ دائر کیا ہے۔
گورنر پر چھیڑ چھاڑ کا الزام
قابل ذکر ہے کہ 2 مئی کو راج بھون کی ایک کنٹریکٹ پر کام کرنے والی خاتون ملازم نے گورنر بوس پر چھیڑ چھاڑ کا الزام لگایا تھا۔ اس کے بعد کولکتہ پولیس نے معاملے کی جانچ کی۔ دریں اثنا، جب اس معاملے پر ٹی ایم سی کی راجیہ سبھا رکن پارلیمنٹ ڈولا سین سے رابطہ کیا گیا تو انہوں نے کہا کہ وہ پارٹی قیادت سے بات کیے بغیر اس معاملے پر تبصرہ نہیں کر سکتیں۔ سین نے خبر رساں ایجنسی پی ٹی آئی سے کہاکہ مجھے یہ جاننے کے لیے پارٹی قیادت سے بات کرنی پڑے گی کہ اصل میں کیا ہوا ہے۔ یہ بہت حساس معاملہ ہے۔
