ممبئی: پیر کے روز ممبئی کے مضافاتی گھاٹ کوپر علاقے میں بارش اور تیز ہوا کے درمیان ایک پیٹرول پمپ پر لوہے کی بڑی ہورڈنگ گرنے سے کم از کم 14 افراد ہلاک اور 60 دیگر زخمی ہو گئے۔ حکام نے بتایا کہ کئی افراد کے پھنسے ہونے کا خدشہ بھی ہے۔ میونسپل کارپوریشن آف گریٹر ممبئی (ایم سی جی ایم) کے ایک عہدیدار نے بتایا کہ یہ واقعہ شام 4.30 بجے چیڈا نگر جم خانہ کے قریب پیش آیا۔
تیز رفتار ہوا کے سبب متعد علاقوں میں بڑے پیمانے پر مالی نقصان بھی ہوا ہے۔ محکمہ موسمیات نے 24 گھنٹے کے لیے ممبئی سمیت ریاست کے الگ الگ حصوں میں الرٹ بھی جاری کیا ہے۔ ایم سی جی ایم کے ایک عہدیدار نے بتایا کہ اطلاع ملتے ہی فائر بریگیڈ کے عملے اور پولیس موقع پر پہنچ کر ریسکیو آپریشن شروع کر دیا ہے۔
بامبے میونسپل کارپوریشن (بی ایم سی) نے کہا کہ وہ اس واقعے کے لیے اشتہاری کمپنی ایگو میڈیا کے خلاف شکایت درج کرے گی۔ ایم سی جی ایم پبلک ریلیشن آفس نے کہا کہ ڈیزاسٹر مینجمنٹ ایکٹ کے تحت ایف آئی آر درج کرکے شکایت درج کی جائے گی۔
ایم سی جی ایم کمشنر بھوشن گگرانی نے کہا کہ این ڈی آر ایف (نیشنل ڈیزاسٹر ریسپانس فورس) کی ٹیم بچاؤ کارروائی میں مصروف ہے۔ انہوں نے کہا کہ ریسکیو آپریشن کے لیے کرینیں اور (گیس) کٹر بھی موقع پر پہنچ گئے ہیں۔ اہلکار نے بتایا کہ زخمی افراد کو علاج کے لیے شہری کے زیر انتظام راجواڑی اسپتال منتقل کردیا گیا ہے۔
مہاراشٹر کے وزیر اعلیٰ ایکناتھ شندے نے واقعہ کو افسوسناک قرار دیا۔ انہوں نے مرنے والوں کے لواحقین کو 5 لاکھ روپے کی ایکس گریشیا دینے کا بھی اعلان کیا۔
مہاراشٹر کے نائب وزیر اعلیٰ دیویندر فڑنویس نے واقعہ کو انتہائی سنگین اور افسوس ناک قرار دیتے ہوئے کہا کہ ریسکیو آپریشن جاری ہے اور آخری شخص کو نکالنے تک ہم اسے جاری رکھیں گے۔ مہاراشٹر کے وزیر اعلی سے بات کرنے کے بعد ہم نے اعلیٰ سطحی جانچ کا حکم بھی دیا ہے۔
انہوں نے یہ بھی بتایا کہ مہاراشٹر کے وزیر اعلیٰ نے ممبئی کے تمام بڑے ہورڈنگز کے آڈٹ کا بھی حکم دیا ہے۔ یہ آڈٹ ایم سی جی ایم کرے گا اور اس کے لیے مختلف ٹیمیں تشکیل دی گئی ہیں۔ پہلے مرحلے میں، بڑے سائز کے ہورڈنگز کا آڈٹ کیا جائے گا۔
