پٹنہ: بہار میں پلوں کے گرنے کا سلسلہ جاری ہے۔ تفصیلات کے مطابق گذشتہ 15 دنوں کے دوران ریاست کے مختلف علاقوں میں 12 پل گرے ہیں یا انہیں نقصان پہنچا ہے۔ 3 جولائی کو ایک ہی دن میں پانچ پلوں کے گرنے کی بھی اطلاع ہے اور آج 4 جولائی کو صبح کے اوقات میں ایک اور پل گر گیا۔ اس طرح 18 جون سے اب تک ریاست کے مختلف علاقوں میں کل 12 پل گر چکے ہیں۔
آپ کو بتا دیں کہ بدھ کو سیوان کے مہاراج گنج اور چھپرا میں بھی پل گرنے کے واقعات پیش آئے۔ چھپرا کے لہلاد پور بلاک کے جنتا بازار دھودھناتھ مندر کے پاس دریا پر بنایا گیا پل گر گیا۔ اسی وقت مہاراج گنج کی دیوریا پنچایت میں سیوان کا ایک پل گر گیا جو دھمی ندی پر بنایا گیا تھا۔ مہاراج گنج بلاک کے نوتن سکندر پور گاؤں کے قریب یہ پل گر گیا، جو گنڈک ندی پر بنایا گیا تھا۔
آپ کو بتاتے چلیں کہ بہار میں گزشتہ 15 دنوں میں 12 پل گرچکے ہیں۔ ارریہ میں 18 جون کو زیر تعمیر پل گر گیا تھا۔ 22 جون کو سیوان میں پل گرنے کا معاملہ سامنے آیا تھا۔ 23 جون کو موتیہاری میں اور 27 جون کو کشن گنج میں پل گرگئے تھے۔ اسی طرح 28 جون کو مدھوبنی میں اور 30 جون کو کھوشی ڈانگی گاؤں میں پل گرنے کا واقعہ سامنے آیا۔ کشن گنج کے ٹھاکر گنج کی پٹھاریا پنچایت میں پل کا ستون گر گیا۔ وہیں سرن کے بنیا پور میں بھی ایک پل گر گیا۔
