لکھنؤ: سماج وادی پارٹی (ایس پی) کے صدر اکھلیش یادو منگل کو رائے بریلی میں کانگریس لیڈر راہل گاندھی کی قیادت میں جاری 'بھارت جوڑو نیائے یاترا' میں شامل ہوں گے۔ اعلیٰ ذرائع نے بتایا کہ کانگریس اور ایس پی اگلے دو دنوں کے اندر ریاست میں اپنی سیٹوں کی تقسیم کو حتمی شکل دے سکتے ہیں۔
دونوں پارٹیوں کے درمیان سیٹوں کی تقسیم 27 جنوری سے تعطل کا شکار ہے جب اکھلیش یادو نے کانگریس کو 11 سیٹیں دینے کا اعلان کیا تھا۔ اکھلیش یادو کے اعلان کے بعد سے سیٹوں کی تقسیم میں کوئی پیش رفت نہیں ہوئی ہے۔ کانگریس کی جانب سے 11 سیٹوں کے بارے میں کوئی اعتراف نہیں کیا گیا تھا حالانکہ دونوں پارٹیوں نے مسلسل کہا کہ بات چیت چل رہی ہے۔ اس دوران اکھلیش یادو نے کانگریس کے قومی صدر ملکارجن کھرگے کی بھارت جوڑو نیائے یاترا میں شامل ہونے کی دعوت قبول کر لی۔
سماج وادی پارٹی کے قومی سکریٹری اور ترجمان راجیندر چودھری نے کہا ہے کہ "اکھلیش یادو راہل گاندھی کے ساتھ کچھ فاصلے کے لیے بریلی کے ایک علاقے بچھرواں میں بھارت جوڑو نیائے یاترا میں شامل ہوں گے۔ وہ رائے بریلی کی یاترا میں شامل ہوں گے"۔ بچھراواں ایک حلقہ اسمبلی نشست ہے جہاں سے 2022 کے اتر پردیش اسمبلی انتخابات میں سماج وادی پارٹی نے کامیابی حاصل کی تھی۔
مزیدپڑھیں
- بی جے پی سماجی انصاف اور ذات پر مبنی گنتی کی مخالف: راہل گاندھی
- نتیش ذاتوں کی گنتی کرانے اور نہ کرانے کے دباﺅ میں پھنس گئے: راہل
رائے بریلی اور امیٹھی دو لوک سبھا حلقے ہیں جہاں ایس پی نے لگاتار کئی لوک سبھا انتخابات میں کوئی امیدوار کھڑا نہیں کیا ہے۔ دونوں پارٹیاں، پہلے حریف ہونے کے باوجود گاندھی اور یادو خاندان کے افراد کے خلاف امیدوار کھڑے نہیں کر رہی تھیں۔
آئی اے این ایس