بیدر: بیدر رنگوں کا تہوار ہولی اور ماہ رمضان کو دیکھتے ہوئے محکمۂ پولیس کی جانب سے شہر بیدر کے امبیڈکر سرکل بسویشور سرکل و شہر کے مختلف چوراہوں سے روٹ مارچ سے نکالا گیا۔ اس موقعے پر بیدر سپرنٹنڈنٹ آف پولیس چنا بسوانا نے کہا کہ پولیس روٹ مارچ بیدر شہر کے علاوہ بیدر کے مختلف تعلقہ جات ہمناآباد، بھالکی، بسواکلیان و دیگر تعلقوں میں نکالا گیا۔ انہوں نے مزید کہا کہ ہولی رنگوں کا تہوار ہے۔ اس تہوار کو امن وشانتی اور بھائی چارہ سے منانا چاہیے۔
رمضان مبارک کا مہینہ چل رہا ہے۔ اس مہینے میں مسلمان خصوصی عبادت کرتے ہیں، روزہ رہتے ہیں، اس اعتبار سے یہ مہینہ کافی اہم اور مقدس ہے۔ اس کے لیے چاہیے کہ ہم ایک دوسرے کے مذہب کا احترام کرتے ہوئے تہوار منائیں۔ ایک دوسرے کے تہوار میں ہم سب لوگ شرکت کر سکیں اور امن و شانتی کا پیغام دے سکیں۔
یہ بھی پڑھیں:
سپرنٹنڈنٹ آف پولیس نے مزید کہا کہ دسویں جماعت کے امتحانات شروع ہو رہے ہیں۔ اس کو دیکھتے ہوئے ضلع بھر میں طلبہ و طالبات کے تحفظ کے لیے خصوصی پولیس کی نگرانی لگائی گئی ہے۔ ضلع میں کسی بھی ناخوشگوار واقعہ کو روکنے کے لیے محکمۂ پولیس بیدر ہمیشہ عوام کے ساتھ ہے۔ سپرنٹنڈنٹ آف پولیس بیدر نے کہا کہ ضلع بھر میں امن اور شانتی کے ماحول کی فضا کو برقرار رکھنا عوام کے ہاتھ میں ہے۔ انہوں نے کہا کہ ضلع میں کہیں پر بھی کوئی ناخوشگوار واقعہ پیش آئے تو محکمۂ پولیس کے کنٹرول روم کو فون کر کے اطلاع دے سکتے ہیں۔
