بھونیشور: اڈیسہ کے بھونیشور میں رام مندر کے قریب واقع برج اینڈ روف کمپنی لمیٹڈ پر سی بی آئی نے چھاپہ مارکر منی لانڈرنگ کے الزام میں تین افراد کو گرفتار کرلیا۔ ملک بھر میں 11 دیگر مقامات پر بیک وقت چھاپے مارے گئے جن میں سے پانچ مقام اڈیسہ میں تھے۔ گرفتار شدگان کی شناخت کمپنی کی اڈیسہ اور بنگال یونٹ کے سربراہ چنچل مکھرجی، سینئر افسر سنتوش موہرانا اور ٹھیکیدار دیودت موہاپاترا کے طور پر کی گئی ہے۔
یہ پیش رفت رات گئے ایک بڑی کارروائی میں اس وقت ہوئی جب نئی دہلی سے آنے والی سی بی آئی ٹیم نے بھونیشور کے نیاپلی علاقے میں ایک ایس یو وی رجسٹریشن نمبر OD 05 BV 9999 کو روکا جس میں خطیر رقم تھی۔ رقم کی ضبطی کے بعد مبینہ منی لانڈرنگ کیس میں حکومت سے منسلک کمپنی کے ملوث ہونے کا شبہ ہوا۔ مبینہ طور پر رقم کے مشتبہ لین دین کے بارے میں انٹیلی جنس معلومات کے بعد سی بی آئی کی طرف سے گاڑی کو ٹریک کیا گیا تھا۔
تحقیقاتی ایجنسی کو شبہ ہے کہ ایک پرائیویٹ فرم مبینہ طور پر کولکتہ میں واقع برج اینڈ روف کمپنی (انڈیا) لمیٹڈ کے عہدیداروں پر اثر انداز ہونے کی کوشش کر رہی تھی، جو ایک سنٹرل پبلک سیکٹر انٹرپرائزز ہے اور مختلف سرکاری پروجیکٹوں سے وابستہ ہے۔
یہ بھی پڑھیں: سندیپ گھوش سی بی آئی کے ہاتھوں گرفتار - CBI Arrests Sandip Ghosh
سی بی آئی کے ذرائع نے بتایا کہ ضبط شدہ رقم کے اصل اور مطلوبہ وصول کنندہ کی شناخت کے لیے تحقیقات جاری ہیں۔ سی بی آئی کو شبہ ہے کہ بھاری صنعتوں کی وزارت کی طرف سے مبینہ طور پر زیر نگرانی پروجیکٹوں میں سرکاری عہدیداروں کو متاثر کرنے کے لئے نقد رقم منتقل کی جارہی تھی۔
