لکھنؤ: گیارہ محرم الحرام کو حسب روایت امام باڑہ غفران مآب میں ’’یوم زینب ؑ‘‘ کا انعقاد عمل میں آیا۔ مجلس کو مولانا سید کلب جواد نقوی نے خطاب کیا۔ مجلس میں عزاداروں نے بڑی تعداد میں شرکت کی۔ امام باڑہ غفران مآب سے گھاس منڈی چوک تک کی گلیوں میں عزاداروں کی بھیڑ رہی۔ اس مجلس میں حضرت علیؑ و فاطمہؑ کی بیٹی اور شریکہ الحسینؑ حضرت زینب سلام اللہ علیہا کو خراج عقیدت پیش کیا جاتا ہے۔
یہ بھی پڑھیں:
رسول خدا کی سیرت اور سنت ہمارے لیے حجت ہے، مولانا کلب جواد نقوی - MUHARRAM 2024
مجلس کو خطاب کرتے ہوئے مولانا کلب جواد نقوی نے کہا کہ اہل عرب قرآن مجید کے اعجاز کے قائل تھے مگر عصبیت کی بنیاد پر انہوں نے قرآن کا انکار کیا۔ آج بھی دنیا قرآن مجید کے اعجاز کی قائل ہے مگر اسلاموفوبیا اور مسلمانوں سے تعصب کی بنیاد پر خدا کی کتاب کی حقانیت سے انکار کیا جاتا ہے۔ انہوں نے دوران مجلس قرآن مجید کی عظمت اور اس کے معجزہ ہونے کو بیان کیا۔ مولانا نے جناب زینب سلام اللہ علیہا کی فضلیت بیان کرتے ہوئے کہا کہ اس عظیم بی بی کا نام خدا کی طرف سے رکھا گیا تھا۔
انہوں نے کہا کہ جناب زینبؑ ہمیشہ اپنے بابا حضرت علیؑ کے لیے سبب زینت رہیں۔ آپ اسم بامسمیٰ تھیں۔ آپ کے بھائی جو درجۂ عصمت پر فائز تھے آپ کے احترام میں کھڑے ہوجایا کرتے تھے جس سے آپ کی علمیت اور عظمت کا اندازہ ہوتا ہے۔ آپ نے اپنے باپ اور ماں کے علاوہ کسی سے تعلیم حاصل نہیں کی۔ اسی لیے آپ کو عالمۂ غیر معلمہ کہا جاتا ہے۔ انہوں نے کہا کہ جناب زینبؑ ’شریکۂ الحسین ‘ ہیں۔ جنہوں نے مقصد امام حسینؑ کو پایۂ تکمیل تک پہونچایا۔ مجلس کے آخر میں مولانا نے حضرت زینب کے فرزندوں عون و محمد کی شہادت کو بیان کرتے ہوئے معرکۂ کربلا میں حضرت زینب ؑ کے صبر اور حوصلے کو بیان کیا۔
