نئی دہلی: اسٹار پہلوان ونیش پھوگاٹ ہریانہ کے آئندہ اسمبلی انتخابات میں جولانہ حلقہ سے لڑیں گی۔ ہریانہ اسمبلی میں 90 سیٹیں ہیں اور ریاست میں 5 اکتوبر کو انتخابات ہوں گے جبکہ ووٹوں کی گنتی 8 اکتوبر کو ہوگی۔ کانگریس کی سنٹرل الیکشن کمیٹی نے جمعہ کو پارٹی سربراہ ملکارجن کھرگے، سینئر لیڈر سونیا گاندھی اور کے سی وینوگوپال کی موجودگی میں میٹنگ کی۔ جمعہ کی شام کو کانگریس نے اپنے امیدواروں کی پہلی فہرست جاری کی۔
ونیش کو جولانہ سیٹ سے میدان میں اتارا گیا ہے۔ قبل ازیں ونیش اور بجرنگ پونیا نے آل انڈیا کانگریس کمیٹی کے ہیڈکوارٹر میں وینوگوپال، پون کھیڑا اور دیپک بابریا کی موجودگی میں پارٹی میں شمولیت اختیار کی۔ ونیش نے بی جے پی اور اس کے آئی ٹی سیل پر تنقید کی۔ ونیش اور بجرنگ نے سابق ریسلنگ فیڈریشن آف انڈیا کے سربراہ برج بھوشن شرن سنگھ کے خلاف ایک مہم کی قیادت کی تھی، جن پر خواتین ریسلرز کو جنسی طور پر ہراساں کرنے کا الزام ہے۔
کانگریس میں شامل ہونے کے بعد صحافیوں سے بات کرتے ہوئے ونیش پھوگاٹ نے کہاکہ ’ہم خوفزدہ نہیں ہوں گے اور ہم پیچھے نہیں ہٹیں گے۔ عدالت میں ہمارا کیس چل رہا ہے، ہم اس میں بھی جیت حاصل کریں گے‘۔
