نئی دہلی: دہلی کے روہنی میں ایک ایک شخص کو اپنے گھر کی دیوار پر 'پاکستان زندہ باد' کے نعرے لکھنے پر گرفتار کر لیا گیا ہے۔ معاملے کے سامنے آنے کے بعد علاقہ میں ہنگامہ کھڑا ہو گیا جس کے بعد پولیس نے ایک نوجوان کو حراست میں لیا۔ تفتیش میں انکشاف ہوا کہ وہ اپنے بھائی کی موت کے بعد سے ذہنی طور پر بیمار ہے۔
بتایا جا رہا ہے کہ ایک نوجوان نے اپنے گھر کی دیوار پر پاکستان کی حمایت میں نعرے لکھ رکھے ہیں۔ نعروں کو دیکھنے کے بعد جب آس پاس کے لوگوں نے اسے ایسا کرنے سے روکنے کی کوشش کی تو وہ سب سے لڑنے لگا۔ اس کے بعد لوگوں نے پولیس کو اطلاع دی۔ پولیس نے موقعے سے نوجوان کو حراست میں لے لیا۔ پولیس حکام کے مطابق نوجوان ذہنی مریض معلوم پڑا ہے اور اس کے اہل خانہ سے پوچھ گچھ کی جا رہی ہے اور تفتیش کی جا رہی ہے۔ قریبی لوگوں کے بیانات بھی لیے گئے ہیں۔
اس واقعے کے بعد علاقے میں بڑی تعداد میں پولیس اہلکار تعینات کر دیے گئے ہیں۔ ساتھ ہی عوام سے امن برقرار رکھنے کی اپیل کی گئی ہے۔ پولیس کا کہنا ہے کہ جائے وقوعہ پر حالات پرسکون ہیں۔ نعرے مٹا دیے گئے ہیں۔ پولیس ملزم کے پرانے مجرمانہ ریکارڈ کی بھی چھان بین کر رہی ہے۔ پولیس اس بات کا پتہ لگا رہی ہے کہ اس نے ایسا کیوں کیا؟ کیا اس نے یہ کام کسی کے دباؤ میں کیا؟ اس کے علاوہ ملزم کے سوشل میڈیا اکاؤنٹس کی بھی چھان بین کی جا رہی ہے۔ وہیں 15 اگست کے نزدیک ہونے کی وجہ سے تمام خفیہ ایجنسیاں سرگرم ہو گئی ہیں۔
