گیا:ریاست بہار کے ضلع گیا کے ٹکاری میں آج اے آئی سی سی کے رکن و سابق مرکزی وزیر طارق انور نے کانگریس لاو دیش بچاو مہم کے تحت معقدہ جلسہ عام کو خطاب کیا۔ جلسے میں شریک ہونے سے قبل گیا میں انہوں نے نامہ نگاروں سے کہا کہ ملک کے موجودہ حالات پر سبھی کو غور کرنے کی ضرورت ہے۔ ملک کو غلط سمت میں جانے سے روکنا ہوگا کانگریس نے ملک کی آزادی کے لیے جنگ لڑی اور پھر ملک کی تعمیر کا کام کیا۔کانگریس کو ملک سے جذباتی لگاؤ ہیں۔
طارق انور نے وزیراعظم نریندر مودی کی تنقید کرتے ہوئے کہا کہ آج ملک کے نوجوانوں کا مستقبل تاریکی میں ڈوبا ہوا ہے۔ بی جے پی اور مودی کو عوام پر بھروسہ نہیں ہے۔ ای ڈی اور سی بی آئی کے نام پر لوگوں کو ڈرایا جا رہا ہے۔ خود کو کسانوں کی خیر خواہ کہلا نے والی مودی حکومت کو کسانوں سے کوئی سروکار نہیں ہے۔ ملک کی معیشت قابل رحم ہو چکی ہے۔ عوام کو گمراہ کرنے کی کوشش کی جا رہی ہے۔
وزیر اعلی نتیش کمار پر تنقید کرتے ہوئے انہوں نے کہا کہ پلٹو رام کی وجہ سے ملک میں بہار کی شبیہ خراب ہوئی ہے۔ ان کا تعلق بہار سے ہے ۔وہ لوگوں سے دوسری جگہوں پر نتیش کمار کے تعلق سے سنتے ہیں تو انہیں خراب لگتا ہے۔
وہیں اورنگ آباد کے کانگریس کے ایم ایل اے آنند شنکر نے بی جے پی کو نشانہ بناتے ہوئے کہا کہ ذات پات اور مذہب کے نام پر لڑانے کی کوشش ہورہی ہے۔ تاکہ پارلیمانی انتخابات میں بی جے پی فائدہ اٹھاسکے۔ لیکن نوجوانوں ، کسانوں ، غریبوں اور مظلوموں کو اپنے ساتھ ہوئی نا انصافیوں کو یاد رکھنا ہوگا اور اسے یاد کر ووٹ کرنا ہوگا۔
یہ بھی پڑھیں:مغربی یوپی میں 'انڈیا' اتحاد سے آر ایل ڈی کی علیحدگی سے مسلم اور جاٹ اتحاد ٹوٹ جائے گا؟
واضح ہوکہ گیا ضلع کے ٹکاری میں واقع راج انٹر کالج کے میدان میں کانگریس کی جانب سے جلسہ عام کا انعقاد ہوا جس کی صدارت یوتھ کانگریس کے رہنما اور ٹکاری نگر پریشد کے چیئر مین اظہر امام نے کی۔
