بریلی: ریاست اترپردش کے بریلی میں اسلحہ لائسنس کی منسوخی پر پریشان بھارتیہ جنتا پارٹی کے بریلی مہانگر سے بی جے پی کے نائب صدر پردیپ اگروال نے سوشل میڈیا پر اپنا دکھ ظاہر کیا ہے اور مسلم مذہب اختیار کرنے کی دھمکی دی ہے۔
انہوں نے اپنی پوسٹ کے ذریعے وزیر اعلی یوگی آدتیہ ناتھ سمیت بی جے پی کے سینئر لیڈروں کو بھی ٹیگ کیا ہے۔ بی جے پی لیڈر نے اپنی پوسٹ میں لکھا، 'میں پردیپ اگروال، نائب صدر، بھارتیہ جنتا پارٹی بریلی مہانگر ہوں۔ کل کے واقعے کے بعد سے پارٹی کے کسی سینئر لیڈر نے، کسی ایم ایل اے، کسی ایم پی، کسی وزیر، کسی اعلیٰ عہدیدار نے میرے معاملے کو نوٹس میں نہیں لیا۔
انھوں نے آگے لکھا کہ اگر کوئی میرا ساتھ نہیں دے سکتا تو کم از کم میرے لیے کھڑا ہو کر پیار سے دو بول تو بول سکتا ہے۔ مجھے اس واقعے سے اتنا دکھ ہوا ہے کہ میں سوچ رہا ہوں کہ کیوں نہ میں ہندو مذہب چھوڑ کر مسلم مذہب اختیار کر لوں، جہاں ان کے ساتھ میں رہوں گا تو درد ہوگا، لیکن دکھ نہیں ہوگا۔ لیکن میرے لیے کوئی بھی نہیں بول رہا ہے۔ باقی جو بھی تقدیر کو منظور ہوگا۔ بھائی اب اگر میری بات نہیں سنی گئی تو میں 15 دن کے اندر مسلمان ہو جاؤں گا۔
اصل مسئلہ کیا ہے؟
دراصل اپریل 2022 کو چوپلا روڈ پر بی جے پی لیڈر پردیپ اگروال اور دو موٹر سائیکل سوار نوجوانوں کے درمیان جھگڑا ہوگیا تھا۔ جس کے بعد پردیپ اگروال نے اپنی بندوق نکال کر فائرنگ کر دی۔ جس سے ایک نوجوان زخمی بھی ہوگیا۔ اس سلسلے میں سبھاش نگر پولس اسٹیشن میں دونوں طرف سے معاملہ درج کرایا گیا تھا۔ اس معاملے میں پردیپ اگروال 7 ماہ تک جیل میں میں بھی بند رہے تھے۔
لیکن بعد میں عدالت میں مقدمہ خارج کر دیا گیا اور پردیپ اگروال کو بری کر دیا گیا۔ اس کے بعد بھی ضلع مجسٹریٹ رویندر کمار نے فائرنگ کے واقعہ کو لے کر پردیپ اگروال کے پستول اور ڈبل بیرل بندوق کے دونوں لائسنس منسوخ کر دیئے تھے۔ اس سے پریشان ہوکر پردیپ نے فیس بک پر ایک جذباتی پوسٹ لکھا ہے اور وزیر اعلیٰ جے پی نڈا اور بی جے پی کے کئی سینئر لیڈروں کو ٹیگ کرکے مسلمان ہونے کی دھمکی دی ہے۔
