بنگلورو (کرناٹک): بنگلورو شہر میں 21 اپریل کو دیر رات ایچ ایس آر لے آؤٹ پر والد کی کار حادثاتی طور پر بچے کے اوپر چڑھ گئی جس کے باعث بچے کی موقع پر ہی موت ہوگئی۔ پولیس ذرائع نے بتایا کہ متوفی بچے کی شناخت شائزہ جنت کے نام سے ہوئی ہے۔
حادثہ اس وقت پیش آیا جب کنبہ اپنے رشتہ دار کی شادی میں شرکت کے لئے چنناپٹنم گیا تھا اور رات تقریباً 11:30 بجے گھر واپس آیا۔ سب افراد گاڑی سے باہر نکلنے کے بعد بچے کے والد نے گاڑی کو باقاعدہ جگہ پر پارک کرنے کا فیصلہ کیا۔ اسی دوران جب باپ نے گاڑی اسٹارٹ کی تو بچہ گاڑی کے قریب پہنچا اور دروازے کے پاس کھڑا ہوگیا۔
یہ بھی پڑھیں: لکھنؤ آگرہ ایکسپریس وے پر سلیپر بس اور ٹرک کے درمیان تصادم، 4 لوگوں کی موت
رات کی تاریکی میں باپ گاڑی کے دروازے کے قریب کھڑے بچے کو دیکھ نہیں سکا۔ جس کے نتیجے میں کار بچے کے اوپر چڑھ گئی جس سے وہ موقع پر ہی جاں بحق ہو گیا۔ یہ منظر سی سی ٹی وی میں قید ہو گیا۔ اس واقعہ کے سلسلے میں ایچ ایس آر ٹریفک پولیس اسٹیشن میں مقدمہ درج کیا گیا ہے۔ پولیس حکام نے جائے وقوعہ کا دورہ کر کے تفتیش شروع کر دی۔ خوفناک حادثے کے بعد علاقے میں کہرام مچ گیا۔
