درگاہ حضرت خواجہ بندہ نواز میں گذشتہ 16 برسوں سے مفت سحری کا انتظام - Sehri in Dargah Khwaja Banda Nawaz

Sehri Arrangement in Dargah Gilbarga: درگاہ حضرت خواجہ بندہ نواز میں زائرین اور ہاسٹلوں میں مقیم طلبا کے لیے گذشتہ 16 برسوں سے سحری کا اہتمام کیا جاتا ہے۔ روضہ مارکیٹ گروپ کے ذمہ دار نے بتایا کہ یہاں کے زائرین اور ہاسٹلوں میں قیام پذیر طلبہ کو پریشان نہ ہونا پڑے، اس لیے 16 برسوں سے یہاں سحری کا انتظام کیا جارہا ہے۔

گلبرگہ: ریاست کرناٹک کے ضلع گلبرگہ میں واقع درگاہ خواجہ دکن حضرت خواجہ بندہ نواز گیسو دراز کے احاطہ میں ماہ رمضان کے موقعے زائرین اور ہاسٹلوں میں مقیم طلبا کے لیے گزشتہ سولہ برسوں سے سحری کا اہتمام کیا جارہا ہے۔ زائرين اور طلبا کے لیے ایک ماہ تک درگاہ کے سجادہ نشین ڈاکٹر سید شاہ خسرو حسینی کی زیر سرپرستی میں اور مرحوم زین الدین شیرنی فروش کے فرزند بابا سیٹھ کی نگرانی میں روضہ مارکیٹ نوجوانوں کے ایک گروپ کی جانب سے سحری کا اہتمام کیا جا تا ہے۔

اس موقعے پر روضہ مارکیٹ گروپ کے ذمہ دار محمد یوسف نے ای ٹی وی بھارت کو بتاتے ہوئے کہا کہ گذشتہ 16 برسوں سے ماہ رمضان المبارک کے موقع پر سحری کا مسلسل اہتمام کیا جا تا ہے تاکہ یہاں پر آنے والے زائرین اور ہاسٹلوں میں مقیم طلبہ کو سحری میں پریشانیوں کا سامنا نہ کرنا پڑے۔ یہاں رمضان المبارک میں ایک ماہ تک روزانہ الگ الگ پکوان کیے جاتے ہیں۔ روزانہ یہاں پر تین سو سے لیکر چارسو تک افراد کے سحری کا اہتمام کیا جاتا ہے۔ روانہ رات کے تین بجے سے ہی سحری کے لیے دسترخوان بچھا یا جاتا ہے۔ اس کام کے لیے یہاں کے نوجوان بڑے جوش وخروش کے ساتھ اپنی خدمات کو انجام دیتے ہیں۔