رائے گنج:مغربی بنگال کے بیربھوم، مالدہ اور شمالی دیناج پور میں مختلف سیاسی جماعتوں کی تشہیری مہم کی وجہ سے سیاسی گہماگہمی زوروں پر رہی۔ امت شاہ نے مالدہ ضلع میں روڈ شو کی قیادت کی جبکہ رائے گنج میں عوامی جلسے کو خطاب کیا۔
امت شاہ نے بی جے پی کے رہنماوں کو مغربی بنگال میں کم سے کم 35 سیٹیں دلوانے کا ہدف دیا ہے۔انہوں نے مزید کہاکہ بنگال کی عوام ممتابنرجی کی حکومت سے مایوس ہے اور اسے تبدیلی چاہئے۔ انہوں نے بنگال کی وزیر اعلیٰ اور ترنمول کانگریس کی سربراہ ممتا بنرجی پر جم کر تنقید کی ۔
انہوں نے کہاکہ دیدی، کان کھول کر سنو، بنگال کے لوگ ہوشیار ہو گئے ہیں ۔انہیں اب زیادہ دنوں تک دبا کر رکھا نہیں جا سکتا ہے۔بنگال کی حکومت نے عام لوگوں کو بنیادی سہولیات سے بھی محروم رکھا ہے۔بنگال کی غریب عوام کے پاس کچھ بھی نہیں ہے۔