کولکاتا:ادھیر رنجن چودھری نے مغربی بنگال پردیش کانگریس کمیٹی کے صدر کے عہدے سے استعفیٰ دے دیا ہے۔لوک سبھا انتخابات2024 میں مرشدآباد کے بہرامپور پارلیمانی حلقہ سے ترنمول کانگریس کے ہاتھوں شکست کے بعد سے ہی ادھیر رنجن چودھری سے متعلق قیاس آرائی تھی کہ وہ کوئی بڑا فیصلہ لیں گے۔
جمعہ کے روز ادھیر چودھری نے ایک پریس کانفرنس میں اعلان کیا کہ انہوں نے پردیش کانگریس کے صدر کے عہدے سے استعفیٰ دے دیا ہے۔ اس معاملے میں ان کی دلیل ہے کہ مغربی بنگال میں کانگریس کو مضبوط بنانا ہے۔
ادھیرنجن چودھری 10 فروری 2010 سے پردیش کانگریس کے صدر کے عہدے پر فائز تھے۔ وہ 10 سال سے زیادہ عرصے تک ریاستی کانگریس صدر کے عہدے پر فائز رہے۔ ادھیر لوک سبھا میں کانگریس لیڈر بھی تھے۔ اس سے پہلے وہ مرشدآباد کے ضلع صدر تھے۔
وہ 25 سال تک بہرام پور سے رکن پارلیمان رہے۔ وہ موجودہ لوک سبھا انتخابات میں ترنمول کے امیدوار یوسف پٹھان سے ہار گئے تھے۔ اس کے بعد ادھیر کے بارے میں قیاس آرائیاں شروع ہوگئیں۔
یہ بھی پڑھیں:سیاست کی پچ پر بھی یوسف پٹھان نے بازی ماری، بنگال کی سیاست میں نئی تاریخ رقم کر دی
حالانکہ پارٹی نے پورے ملک میں اچھا کام کیا ہے لیکن بنگال میں کانگریس کو شکست کا سامنا کرنا پڑا ہے۔مغربی بنگال میں کانگریس پارٹی دو سے ایک سیٹ پر آ گئی ہے۔ مغربی بنگال میں کانگریس کی مایوس کن کارکردگی کے بعد ادھیر چودھری دباؤ میں تھے۔
