شمالی24 پرگنہ :مغربی بنگال کے شمالی24 پرگنہ کے بشیر ہاٹ سب ڈویژن میں واقع سندیش کھالی نام کا ایک گاوں ان دنوں منفی وجوہات کی بنا پر سرخیوں میں ہیں۔گزشتہ چند دنوں سے بی جے پی نے سندیش کھالی واقعے کو لے کر خوب ہنگامہ کیا۔بی جے پی کی سیاست کے درمیان مغربی بنگاک کانگریس کے صدر ادھیر رنجن چودھری بھی اپنے سینکڑوں حامیوں کے ساتھ سندیش کھالی جانے کا اعلان کردیا۔
سندیش کھالی کے دورے پر جانے والے کانگریس کے رکن پارلیمان ادھیر رنجن چودھری اور ان کے حامیوں کو رام پور کے مقام پر پولیس نے روک دیا۔پولیس کے ذریعہ روکے جانے پر ادھیر رنجن چودھری بیچ سڑک پر اپنے حامیوں کو لے کر دھرنے پر بیٹھ گئے۔اسی درمیان پولیس اہلکاروں اور کانگریس کے حامیوں کئ درمیان ہاتھاپائی شروع ہوگئی۔کانگریس کے حامی پولیس بریکیڈ توڑ کر آگے جانا چاہتے تھے لیکن پولیس دیوار بن کر کھڑی ہوگئی تھی۔
مغربی بنگال پردیش کانگریس کے صدر ادھیر رنجن چودھری نے کہاکہ گزشتہ ایک ماہ سے سندیش کھالی تشدد کی آگ میں جل رہا ہے۔حکمراں جماعت ترنمول کانگریس اور بی جے پی سندیش کھالی کو لے کر سیاست میں مصروف ہیں۔دونوں پارٹیوں کی جانب سے اس معاملے میں واضح طور پر کچھ کہا نہیں جا رہا ہے۔اس کا مطلب یہ ہے کہ سندیش کھالی کو لے کر سیاست کی جا رہی ہے۔
ادھیر رنجن چودھری نے کہاکہ مغربی بنگال کی وزیر اعلیٰ ممتابنرجی سندیش کھالی کو لے کر آخر خاموش کیوں ہیں۔انہیں اس معاملے میں بولنا چاہئے۔بنگال کی عوام ان کی باتوں کو سننے کے لیے بے چین ہیں۔ان کی خاموشی کا مطلب کیا ہے۔
یہ بھی پڑھیں:سندیش کھالی میں بدامنی کیلئے بی جے پی ذمہ دار، وزیراعلیٰ ممتا بنرجی
لوک سبھا میں کانگریس کے ادھیر رنجن چودھری نے کہاکہ سندیش کھالی معاملے کو لے کر کسی کو مذہب کی سیاست کرنے کی کوئی ضرورت نہیں ہے۔بنگال میں مذہب کی سیاست کے لئے کوئی جگہ نہیں ہے۔ووٹ کے لئے اگر کوئی ایسا کرنا چاہتا ہے تو کانگریس بنگال کے لوگوں کے ساتھ سڑکوں پر اترے گی۔
