اینٹیگا: ٹی 20 ورلڈ کپ 2024 کے سپر 8 مرحلے کے دوسرے میچ میں آج ہندوستان کا مقابلہ بنگلہ دیش سے ہوگا۔ یہ میچ انٹیگا کے سر ویوین رچرڈز اسٹیڈیم میں ہندوستانی وقت کے مطابق رات 8 بجے سے کھیلا جائے گا۔ ہندوستان کی نظریں یہ میچ جیت کر سیمی فائنل میں پہنچنے کا دعویٰ مضبوط کرنے پر ہوں گی۔ ٹورنامنٹ میں اب تک ناقابل شکست رہنے والی ہندوستانی ٹیم اس میچ کے لیے فیورٹ ہے۔ تاہم بنگلہ دیش کو کمتر سمجھنامہنگا ثابت ہو سکتا ہے۔
ہندوستان اور بنگلہ دیش کے درمیان ٹی ٹوئنٹی ریکارڈز کی بات کریں تو دونوں ٹیموں کے درمیان اب تک کل 13 میچز کھیلے جا چکے ہیں۔ اس دوران ہندوستانی ٹیم حاوی رہی۔ ہندوستان نے 13 میں سے 12 میچ جیتے ہیں۔ اس کے ساتھ ہی بنگلہ دیش کو صرف ایک میچ میں فتح ملی ہے۔ آج کھیلے جانے والے میچ سے پہلے ہی خیال کیا جا رہا ہے کہ بنگلہ دیش کے لیے مضبوط ہندوستانی ٹیم کو شکست دینا مشکل ہو گا۔ تاہم کرکٹ غیر یقینی صورتحال کا کھیل ہے جس میں کچھ بھی ناممکن نہیں ہے۔
اینٹیگامیں واقع سر ویوین رچرڈز اسٹیڈیم کی پچ کو سست سمجھا جاتا ہے۔ اسپنروں کو اس پچ سے بڑی مدد ملتی ہے ۔ بلے بازوں کے لیے یہاں رنز بنانا بالکل آسان نہیں ہے۔ ایسے میں ہندوستان اور بنگلہ دیش کے درمیان ہونے والے آج کے میچ میں دونوں ٹیموں کے اسپن گیند باز کافی کارآمد ثابت ہونے والے ہیں۔
ہندوستانی کھلاڑیوں پر نظریں ہوں گی
بنگلہ دیش کے خلاف آج کے اہم میچ میں رنز بنانے کی ذمہ داری ان فارم سوریہ کمار یادو اور رشبھ پنت پر ہوگی۔ ان دونوں کھلاڑیوں نے ٹاپ آرڈر کی ناکامی کے بعد ٹیم انڈیا کو کئی بار مشکل سے بچایا ہے۔ ساتھ ہی بالنگ میں ابتدائی وکٹ لینے کی ذمہ داری جسپریت بمراہ اور ارشدیپ سنگھ پر ہوگی۔ اس کے ساتھ ہی اسپن پچ کو مدنظر رکھتے ہوئے کلدیپ یادو، رویندر جڈیجہ اور اکشر پٹیل سے درمیانی اوورز میں شاندار گیند بازی کی توقع کی جائے گی۔ ہندوستان اس میچ میں افغانستان کے خلاف صرف اپنے پلیئنگ 11 کے ساتھ میدان میں اتر سکتا ہے۔
بنگلہ دیش کی مضبوط بالنگ سائیڈ
بنگلہ دیش کو ہلکے سے لینا ہندوستان کو مہنگا پڑ سکتا ہے۔ بنگلہ دیش کے تیز گیند باز تسکین احمد، مستفیض الرحمان اور تنظیم شکیب کسی بھی بیٹنگ لائن اپ کو تباہ کرنے کی صلاحیت رکھتے ہیں۔ اس کے ساتھ ساتھ آل راؤنڈر شکیب الحسن گیند اور بلے دونوں سے کسی بھی وقت میچ کا رخ بدلنے کی صلاحیت رکھتے ہیں۔ تاہم بنگلہ دیش کی کمزوری اس کی بیٹنگ ہے۔ بنگلہ دیش کے بلے باز ٹی20 ورلڈ کپ 2024 میں توقع کے مطابق کارکردگی کامظاہرہ کرنے میں ناکام رہے ہیں۔
دونوں ٹیموں کے ممکنہ پلیئنگ 11
ہندوستان: روہت شرما (کپتان)، وراٹ کوہلی، رشبھ پنت (وکٹ کیپر)، سوریہ کمار یادو، شیوم دوبے، ہاردک پانڈیا، رویندرا جڈیجہ، اکسر پٹیل، کلدیپ یادیو، جسپریت بمراہ، ارشدیپ سنگھ۔
یہ بھی پڑھیں:سپر8: ٹیم انڈیا نے افغانستان کو 47 رنوں سے شکست دی
بنگلہ دیش: تنضی حسن تمیم، نظم الحسین شانتو (کپتان)، لٹن کمار داس (وکٹ کیپر)، شکیب الحسن، توحید ہردوئے، محمود اللہ، ذاکر علی، رشاد حسین، تسکین احمد، مستفیض الرحمان اور تنظیم شکیب۔
