نئی دہلی: ٹی ٹوئنٹی ورلڈ کپ 2024 کا پہلا میچ آج صبح آٹھ بجے سے کھیلا جارہا ہے۔ اس سے قبل بھارت بمقابلہ بنگلہ دیش کے درمیان کھیلے گئے وارم اپ میچ میں بھارت نے بنگلہ دیش کو بری طرح شکست دی۔ بھارت نے ٹاس جیت کر پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 182 رنز بنائے۔ جس کے جواب میں بنگلہ دیش کی ٹیم 20 اوورز میں 9 وکٹوں کے نقصان پر صرف 122 رنز بنا سکی۔ بھارت نے یہ میچ باآسانی 60 رنز سے جیت لیا۔
بھارتی کھلاڑیوں کی کارکردگی کی بات کریں تو ہاردک پانڈیا اور رشبھ پنت نے شاندار اننگز کھیلی۔ دسمبر 2022 میں حادثے کے بعد پہلی بار بھارتی جرسی میں کھیلنے والے پنت نے نصف سنچری لگائی۔ انہوں نے 32 گیندوں پر 52 رنز کی اننگز کھیلی۔ پنت نے اپنی اننگز میں 4 چوکے اور 4 چھکے لگائے۔
اس کے علاوہ ہاردک پانڈیا جو کہ آئی پی ایل میں اپنی خراب کارکردگی سے نبردآزما تھے، نے بھی آل راؤنڈ کارکردگی دکھائی۔ انہوں نے 23 گیندوں پر 40 رنز کی اننگز کھیلی جس میں 4 چھکے اور 2 چوکے شامل تھے۔ ہاردک نے شاندار کارکردگی کا مظاہرہ کیا اور 1 اوور میں تنویر اسلام کو لگاتار 4 چھکے لگائے۔ اس کے علاوہ پانڈیا نے 3 اوور میں 30 رن دے کر 1 وکٹ بھی حاصل کی۔
سنجو سیمسن کچھ خاص کارکردگی نہ دکھا سکے اور 6 گیندوں میں 1 رن بنانے کے بعد آؤٹ ہو گئے۔ اس کے علاوہ کپتان روہت شرما نے 19 گیندوں میں 23 اور سوریہ کمار یادیو نے 18 گیندوں میں 31 رنز بنائے۔
بھارت کی گیندبازی کی بات کریں تو پریکٹس میچ میں بھارت کے 8 بولرز نے گیندبازی کی۔ ارشدیپ سنگھ اور شیوم دوبے نے دو دو وکٹیں حاصل کیں۔ دونوں گیند بازوں نے 3 اوورز میں بالترتیب 12 اور 13 رنز دیے۔ وہیں جسپریت بمراہ نے 2 اوورز میں 12 رنز دے کر 1 وکٹ، محمد سراج نے 3 اوورز میں 17 رنز دے کر ایک وکٹ حاصل کی۔ ہاردک پانڈیا نے بھی ایک وکٹ حاصل کی۔
ورلڈ کپ سے قبل ہاردک پانڈیا کی فارم میں واپسی بھارت کے لیے اچھی نشاندہی ہے۔ ساتھ ہی بھارت کے پاس آل راؤنڈرز کی بھی کمی نہیں ہے۔ اس میچ میں رویندرا جڑیجا، شیوم دوبے، کلدیپ یادو، ہاردک پانڈیا نے شاندار کارکردگی کا مظاہرہ کیا۔
یہ بھی پڑھیں:
