سلہٹ :207 رن کے ہدف کے تعاقب میں بنگلہ دیش کی شروعات انتہائی خراب رہی اور پہلے ہی اوور میں اوپنر لٹن کمار داس کی وکٹ گنوا دی۔ اس کے بعد سومیا سرکار 12 رن، کپتان نجمل شانتو 20 رن، محمد۔ توحید ہردوئے آٹھ رن بنا کر آؤٹ ہوئے۔ ایک وقت بنگلہ دیش 68 رن پر چار وکٹیں گنوا چکا تھا اور ایسا لگ رہا تھا کہ بنگلہ دیش کی اننگز جلد ہی ختم ہو جائے گی۔ ایسے وقت میں محمود اللہ اور ذاکر علی نے بنگلہ دیش کی اننگز کی ذمہ داری سنبھالی۔ محمود اللہ نے 31 گیندوں میں دو چوکوں اور چار چھکوں کی مدد سے 54 رن بنائے۔
وہیں ذاکر علی نے 34 گیندوں پر چار چوکوں اور چھ چھکوں کی مدد سے 68 رن کی اننگز کھیل کر ٹیم کو فتح کے قریب پہنچا دیا۔ مہدی حسن 16 رن بنا کر آؤٹ ہوئے، رشاد حسین صفر پر آؤٹ ہوئے۔ تسکین احمد تین رن بنا کر ناٹ آؤٹ رہے اور شرف الاسلام چار رن بنا کر ناٹ آؤٹ رہے۔ بنگلہ دیش کی ٹیم مقررہ 20 اوور میں آٹھ وکٹوں پر صرف 203 رن بنا سکی اور میچ تین رن سے ہار گئی۔
سری لنکا کی جانب سے اینجلو میتھیوز، بنورا فرنینڈو اور داسن شنکا نے دو دو وکٹیں حاصل کیں۔ مہیش تھیکشنا اور متھیشا پاتھیرانا نے ایک ایک بلے باز کو آؤٹ کیا۔اس سے قبل سدیرا سماراویکراما کے ناٹ آوٹ 61 رن، کوسل مینڈس کی 59 رن کی نصف سنچری اننگز اور چرتھ اسالنکا کی 44 رن کی طوفانی اننگز کی مدد سے سری لنکا نے بنگلہ دیش کو جیت کے لیے 207 رن کا ہدف دیا تھا۔
آج یہاں سلہٹ انٹرنیشنل کرکٹ اسٹیڈیم میں بنگلہ دیش نے ٹاس جیت کر پہلے گیند بازی کا فیصلہ کیا۔ بیٹنگ کے لیے آنے والی سری لنکا کی شروعات انتہائی خراب رہی اور پہلے ہی اوور میں چار رن پر اوپنر اویشکا فرنینڈو کی وکٹ گنوا دی۔ اس کے بعد کامندو مینڈس بھی پانچویں اوور میں 19 رن بنانے کے بعد پویلین لوٹ گئے۔ کوسل مینڈس اور سدیرا سمارا وکرما نے اننگز کو سنبھالا۔ دونوں کے درمیان تیسری وکٹ کے لیے 96 رن کی شراکت ہوئی۔ کوسل مینڈس نے 36 گیندوں میں چھ چوکوں اور تین چھکوں کی مدد سے 59 رن بنائے۔
یہ بھی پڑھیں:ممبئی نے تمل ناڈو کو شکست دے کر فائنل میں رسائی حاصل کی
سدیرا سمارا وکرما نے 48 گیندوں پر آٹھ چوکوں اور ایک چھکے کی مدد سے 61 رن کی ناٹ آوٹ اننگز کھیلی۔ کپتان چرتھ اسالنکا نے چھ چھکوں کی مدد سے 21 گیندوں پر ناٹ آوٹ 44 رن بنائے۔ سری لنکا نے مقررہ 20 اوورز میں تین وکٹوں پر 206 رن بنائے۔بنگلہ دیش کی جانب سے شرف الاسلام، تسکین احمد اور رشاد حسین نے ایک ایک بلے باز کو آؤٹ کیا۔
یو این آئی
